Tags-Ghamand

ġhurūr-e-āftāb se zamīñ kā dil saham gayā
tamām bārisheñ thamīñ ghaTā hī aur ho ga.ī

junūn-e-ishq-e-sar bedār bhī hai
ġhurūr-e-bāda-e-sarshār bhī hai

tazād-e-hastī kā falsafa huuñ uruuj o pastī kā aa.inā huuñ
uThā huā ik ġhurūr-e-sar huuñ miTā huā ek naqsh-e-pā huuñ

tū sirf merī hai us kā ġhurūr hai mujh ko
agar ye vahm merā hai to koī baat nahīñ

chalo na sar ko uThā kar ġhurūr se apnā
girā hai jo bhī bulandī se Dhaal tak pahuñchā

jaane kis meñ hai ājizī merī
jaane kis kā ġhurūr hai mujh meñ

yaktā-e-zamāna hone par sāhab ye ġhurūr ḳhudā.ī kā
sab kuchh ho magar ḳhākam-ba-dahan kyā koī ḳhudā ho jaatā hai

mel āsmāñ kā sū-e-zamīñ be-sabab nahīñ
zer-e-qadam jagah hai sar-e-pur-ġhurūr kī

ye dekhte ho jo kāsa-e-sar ġhurūr-e-ġhaflat se kal thā mamlū
yahī badan naaz se palā thā jo aaj miTTī meñ gal rahā hai

terī peshānī pe jhalkegā misāl-e-barq-e-tūr
tifl kā nāz-e-sharāfat aur shauhar kā ġhurūr

dahshat-e-fardā se tharrā.egā jab un kā ġhurūr
haal se tū hogī raazī ḳhauf-e-mustaqbil se duur

hai un ke āstāñ pe hujūm-e-ġhurūr-o-nāz
gunjā.ish-e-jabīñ ho to sajda kare koī

ġhurūr-e-husn ko mānūs-e-iltijā karte
vo ham nahīñ ki jo ḳhud-dāriyāñ fanā karte

ġhurūr-e-zabt se āh-o-fuġhāñ tak baat aa pahuñchī
havas ne kyā kiyā dil se zabāñ tak baat aa pahuñchī

tū chupke chupke muravvat se kyuuñ bichhaḌtā hai
mirā ġhurūr bhī thā terī kaj-adā.ī tak

khiḌkī se jhāñktā huā vo pur-ġhurūr sar
taaza havā se us kā koī iḳhtilāf thā

tamām sañg-dilī yā ki phir ġhurūr-o-hasham
kuchh aur is ke sivā bhī jahāñ-panāh meñ thā

kab use rukne kī fursat thī ġhurūr-e-husn meñ
maiñ ta.āqub meñ ravāñ thā maiñ sadā detā rahā

toḌnā hogā chhalakte hue sāġhar kā ġhurūr
bin piye bazm ko ab rañg pe aanā hogā

paspā.iyoñ ne gaaḌ diye daañt pusht par
yuuñ dāman-e-ġhurūr huā taar taar phir