Tags-Ghamand

ġhurūr se jo zamīñ par qadam nahīñ rakhtī
ye kis galī se nasīm-e-bahār aatī hai

anā ke ḳhol se nikleñ to yuuñ bhī mumkin hai
dar-e-faqīr pe dast-e-ġhurūr dastak de

ishq kī mushkil-pasandī se huā ye āshkār
ḳhūbsūrat ko ġhurūr-e-husn thoḌā chāhiye

kahīñ duniyā-e-ulfat ko tah-o-bālā na kar Daale
ġhurūr-e-husn ke aa.iin kā dastūr ho jaanā

aa.ina dekh kar ġhurūr fuzūl
baat vo kar jo dūsrā na kare

paanī se sag-gazīda Dare jis tarah 'asad'
Dartā huuñ aa.ine se ki mardum-gazīda huuñ

anā ġhurūr takabbur hayāt kuchh bhī nahīñ
ki saarā khel hai pyāre ye chaar sāñsoñ kā

aaj ye soch ke larzāñ hai jafā-jū kā ġhurūr
qumqume kis liye dhartī pe utar aa.e haiñ

ādarsh man meñ chaah kā shardhā nibāh kī
ānand us ke mukh pe muqaddas ġhurūr kā

ahvāl vāqa.ī to hai ḳhud hī zabān-e-jāñ
lekin sar-e-ġhurūr kahīñ bhī jhukā nahīñ

kyuuñ kibr-o-ġhurūr is daur pe hai kyuuñ dost falak ko samjhā hai
gardish se ye apnī baaz aayā yā rañg badalnā chhoḌ diyā

tū apne husn-o-nāz ke ġhurūr meñ hī jal bujhī
vo luuT legā bazm apnī ḳhush-kalāmiyoñ ke saath

hai garm mulkoñ kā sūraj tire jalāl kī gard
ġhurūr-e-kāhkashāñ hai tire jamāl kī gard

tārīf roz lete ho apne ġhurūr kī
mujh ko barahman-e-but-e-pindār kar diyā

tujhe ġhurūr mujhe ājizī mile 'rāshid'
yuuñ e'tibār ke pindār se guzar ke na jā

nāz-o-niyāz-e-āshiq-o-ma.ashūq kyā kahūñ
ijz o ġhurūr shaah o gadā kuchh na pūchhiye

kal tak bahut ġhurūr meñ phirtī thī zindagī
ab maut sāmne hai batā kyā karegī aaj

vo sail-e-nūr hai ḳhīra hai aadmī kī nazar
ba-sad ġhurūr-o-adā ḳhanda-zan hai gardūñ par

ba-sad ġhurūr ba-sad faḳhr-o-nāz-e-āzādī
machal ke khul ga.ī zulf-e-darāz-e-āzādī

janāb-e-'nūh' zamāne kā e'tibār nahīñ
burā kiyā jo kisī se ġhurūr maiñ ne kiyā