Tags-Ghamand

ajiib karb meñ Duubī huī sadā hogī
ġhurūr jab tirā ban kar chaTān TūTegā

sun ai ġhurūr-e-husn tirā tazkira hai kyā
asrār-e-kā.enāt se āgāh ishq hai

kisī kā ġhamza sharāboñ se chuur qaus-e-quzah
adā ġhurūr javānī surūr ishva-garī

jabīn charāġh muqaddar kushāda dhuup sahar
ġhurūr qahr ta.ajjub kamāl nuur bharī

maiñ bosa le le ke ruḳh kā uThā diyā parda
isī ġhurūr pe karte the lan-tarānī aap

kab tak jiyegā dār-e-fanā meñ batā to de
sar meñ ġhurūr-e-ālam-e-imkāñ liye hue

kaunain pe bhārī hai allāh re ġhurūr un kā
itne bhī adā vaale maġhrūr nahīñ hote

vo dahan huuñ na niklā harf-e-ġhurūr
vo zabāñ huuñ na jis se laaf huā

rakhte nahīñ ġhurūr se vo paañv arsh par
chalte haiñ sar ke bal jo rah-e-kū-e-yār meñ

tujhe kār-gāh-e-fanā batā inhī hastiyoñ pe ġhurūr hai
jo sharīk-e-sūd-o-ziyāñ nahīñ jo rahīn-e-naf-o-zarar nahīñ

vo daur merī umr kā thā yādgār daur
jis meñ ki tere husn pe mujh ko ġhurūr thā

inkisār meñ ik ġhurūr sā
kuchh ḳhumār sā kuchh surūr sā

maiñ ḳhush huuñ ham-safaroñ ne ki mujh se chhīn liyā
ġhurūr-e-rahravī jo kārvāñ se pahle thā

vo jab chāhe jise chāhe ġhurūr-e-āshnā.ī de
nazar bhar kar jise dekhegā vo surḳhāb kar degā

aql kitnī shu.ūr kitnā hai
phir bhī tujh ko ġhurūr kitnā hai

rakkhā gayā huuñ izzat-o-tauqīr kā asiir
bāñdhā gayā hai sar ko ġhurūr-e-kulāh meñ

mujhe yuuñ apne se duur kar ke na ḳhush rahoge ġhurūr kar ke
so mujh se kuchh fāsle pe rakkho ye rakh-rakhāv mujhe manāo

dast-e-hunar pe nok-e-sināñ par ġhurūr hai
lekin jarī jo nok-e-sināñ kaaT dī ga.ī

ġhurūr-e-jehl ne hindostāñ ko luuT liyā
ba-juz nifāq ke ab ḳhaak bhī vatan meñ nahīñ