Tags-Ghamand

suroñ meñ kibr-o-ġhurūr kyuuñ hai diloñ ke shīshe ye rañg kyuuñ hai
ḳhudā-e-bartar tirī zamīñ par zamīñ kī ḳhātir ye jañg kyuuñ hai

TuuT jā.egā dar-e-dīvār-e-zindāñ kā ġhurūr
ek āvāz aa.egī qaidī rihā ho jā.egā

bahār kyā ab ḳhizāñ bhī dekhe ġhurūr-e-husn-e-suḳhanvarī meñ
jo āsmānoñ meñ jā basā thā zamīñ ke qadmoñ meñ aa gayā hai

kitnā ġhurūr hai tumheñ husn-o-jamāl par
go yād-e-yār-e-husn tumhāre amal meñ hai

ai nā-ḳhudā-e-vaqt na itnā ġhurūr kar
Duube haiñ sāhiloñ pe safīne kabhī kabhī

yahī jatan hai ki taqdīr sar-nigūñ na rahe
use bhī is nigah-e-nāz kā ġhurūr mile

ġhurūr bhī jo karūñ maiñ to ājizī ho jaa.e
ḳhudī meñ lutf vo aa.e ki be-ḳhudī ho jaa.e

faqat tumhīñ ko nahīñ apnī sādgī pe ġhurūr
dimāġh arsh pe rahte haiñ ḳhāksār ke bhī

baḌe adab se ġhurūr-e-sitam-garāñ bolā
jab inqalāb ke lahje meñ be-zabāñ bolā

baḌā ġhurūr thā donoñ ko ham-navā.ī par
nigāh us kī thī lekin surūr merā thā

na tū mirā na tirī ham-nashīniyāñ merī
bharam hai jis ko samajhte haiñ sab ġhurūr ab tak

allāh rakkhe us kā salāmat ġhurūr-e-husn
āñkhoñ ko jis ne dī hai sazā intizār kī

hazīmateñ jo fanā kar ga.iiñ ġhurūr mirā
unhī ke dam se munavvar huā shu.ūr mirā

ġhurūr-e-husn se koshish matānat iḳhtiyārī kī
tumhārī shoḳhiyoñ meñ rā.egāñ ma.alūm hotī hai

iltimās-e-qatl par kahte ho fursat hī nahīñ
ab tumheñ itnā ġhurūr allāhu-akbar ho gayā

tere faqīr kā ġhurūr tājvaroñ se hai sivā
tarf-e-kulah meñ de shikan us ko ye dard-e-sar nahīñ

jin safīnoñ ne kabhī toḌā thā maujoñ kā ġhurūr
us jagah Duube jahāñ dariyā meñ tuġhyānī na thī

ġhurūr-e-ishq ziyāda ġhurūr-e-husn se hai
idhar to aañkh bharī dam udhar ravāna huā

tirā ġhurūr-e-abas intihā.ī sat.h pe hai
bulandī par bhī vahī hai jo khaa.ī sat.h pe hai