Tags-Ghar

tiir par tiir lage to bhī na paikāñ nikle
yārab is ghar meñ jo aave na vo mehmāñ nikle

bahut chhoTā safar thā zindagī kā
maiñ apne ghar ke andar tak na pahuñchā

chalo ke dekh leñ 'ġhālib' ke ghar kī dīvāreñ
na.ī rutoñ ne bayābāñ meñ Dere Daale haiñ

mirā qayām hai ghar meñ musāfiroñ jaisā
ye ghar bhī rāhguzar meñ rahe to achchhā hai

maanā dushvār sahī phir bhī kareñ kyā āḳhir
tere ghar tak agar aayā yahī rasta aayā

vaqt aur masrūfiyat ke mas.ale sab ik taraf
dūriyāñ itnī nahīñ thiiñ 'tāj' apne ghar ke biich

dasht kī vus.at-e-be-qaid meñ kyā niiñd aatī
ghar kī qaid-e-dar-o-dīvār ne sone na diyā

aa.e bhī aur ga.e bhī ḳhālī haath
chhoḌo duniyā ko aur ghar dekho

ab vo patthar kahāñ se aa.egā
ab tirā ghar chaTān meñ bhī nahīñ

umr bhar buuñd buuñd ko tarse
sāmne ghar ke ek dariyā thā

huā hai yuuñ bhī ki ik umr apne ghar na ga.e
ye jānte the koī raah dekhtā hogā

duur kisī ko yaad aatā huuñ raat mujhe pāgal kartī hai
ghar se duur nikal jaatā huuñ raat mujhe pāgal kartī hai

duur des ik ghar hai apnā jaise koī ik sundar sapnā
sapne meñ ḳhud ko paatā huuñ raat mujhe pāgal kartī hai

aisī taqsīm kī sūrat nikal aa.ī ghar meñ
dhuup ne hijr kī dīvār uThā.ī ghar meñ

sail aisā thā ki sab shahr-e-badan Duub gayā
raat bārish ne ajab bazm sajā.ī ghar meñ

muntazir kitne rahe band darīche saare
terī āvāz na phir lauT ke aa.ī ghar meñ

dar-o-dīvār mahakne lage andāzoñ se
maiñ ne tasvīr tirī juuñ hī lagā.ī ghar meñ

yuuñ hī ik raat use dil se nikālā kyā thā
phir mujhe raas koī raat na aa.ī ghar meñ

ki pahle kī iz.hār ḳhud us ne ulfat
na aayā to sau baar ghar se bulāyā

so ab vo jhalak tak dikhātā nahīñ hai
gayā maiñ jo ghar se to dar tak na aayā