Tags-Ghar

jab tū ne hī nigāh meñ rakkhā nahīñ hameñ
ab aur kisī ke zehn meñ ghar kis liye kareñ

aañkh par tinkoñ kī chilman hoñT par lohe kā qufl
ai dil-e-be-ḳhānamāñ kis ghar meñ le aayā mujhe

chāhe kitnī hī sajāvaT se muzayyan ho magar
maañ nazar aa.e to ghar asl meñ ghar lagtā hai

maiñ apne jism meñ rahtī huuñ is takalluf se
ki jaise aur kisī dūsre ke ghar meñ huuñ

kyā kamī hai ki nigāhoñ se gire jaate ho
dil meñ ghar karne kī tum ko to adā aatī hai

bām-o-dar kī raushnī phir kyuuñ bulātī hai mujhe
maiñ nikal aayā thā ghar se ik shab-e-tārīk meñ

abhī tum ghar se bāhar mat nikalnā
tumhārī hosh kī hālat nahīñ hai

ghar ke jaisā kahīñ ārām nahīñ pāoge
koī kahtā hai ki ab chhoḌ ke ghar mat jaanā

bahut din guzre ab dekh aa.uuñ ghar ko
kaheñge kyā dar-o-dīvār mere

dekh in chiḌiyoñ ko chiḌiyā-ghar na dekh
lauT mat pīchhe ko yuuñ muḌ kar na dekh

apnī dīvāroñ se kuchh bāhar nikal
sirf ḳhālī ghar ke bām-o-dar na dekh

phir to DhūñDā bhī nahīñ miltā koī murġh-e-chaman
ghar agar sayyād kā hotā kisī gulshan ke paas

vo jo mere paas se ho kar kisī ke ghar gayā
reshmī malbūs kī ḳhushbū se jaadū kar gayā

apne hī ghar ke sāmne huuñ but banā huā
parde haTe hue haiñ darīcha khulā huā

shab-e-va.ada tū agar aa.e hai to darañg kyā hai mire ghar aa
ki ye āñkheñ lag rahī dar se haiñ shab-e-rashk-e-mah ba-ḳhudā dar aa

rahe na ghar ke hue ḳhvār ye to honā thā
tirī talāsh meñ ai yaar ye to honā thā

hamīñ ne us ke liye rāste banā.e the
ki ghar tak aa gayā bāzār ye to honā thā

pyaar se sab dushmanoñ ke dil meñ ghar us ne kiyā
dostī kā ma.arka is tarah sar us ne kiyā

ho ga.ī bīnā.ī to sab us kī dīvāroñ meñ jazb
un ke ghar ko dekh kar ab apnā ghar dekhegā kaun

jo shab-ḳhūñ mārtā hai merī bastī ke ujāloñ par
muqaddar us ke bhī ghar kā añdherā likh diyā jaa.e