Tags-Ghar

sub.h kā bhūlā shaam ko vāpas ghar aa.e to ġhanīmat hai
jin galiyoñ meñ jā ke na lauTo un galiyoñ meñ jaao kyuuñ

har ek Dūbtā manzar dikhā.ī detā hai
hamāre ghar se samundar dikhā.ī detā hai

hamāre biich ye nazdīkiyāñ hī kaafī haiñ
tumhāre ghar se mirā ghar dikhā.ī detā hai

ḳhāndānī rishtoñ meñ aksar raqābat hai bahut
ghar se niklo to ye duniyā ḳhūbsūrat hai bahut

umr kī saarī thakan laad ke ghar jaatā huuñ
raat bistar pe maiñ sotā nahīñ mar jaatā huuñ

ghar pahuñchtā hai koī aur hamāre jaisā
ham tire shahr se jaate hue mar jaate haiñ

yuuñ bhī to kitnī chīzeñ haiñ is ghar meñ
merā dil kuchh roz rakhā jā saktā hai

thī jo vo ik tamsīl-e-māzī āḳhirī manzar us kā ye thā
pahle ik saaya sā nikal ke ghar se bāhar aatā hai

sab umr to jaarī nahīñ rahtā hai safar bhī
aatā hai kisī din to bashar lauT ke ghar bhī

andar se phahoñde hue dīvār bhī dar bhī
dekhe haiñ baḌe logoñ ke ham ne baḌe ghar bhī

har samt hai vīrānī sī vīrānī kā aalam
ab ghar sā nazar aane lagā hai mirā ghar bhī

pāgal hai patā pūchh rahā hai mire ghar kā
kyā ḳhāna-ba-doshoñ kā huā kartā hai ghar bhī

ghar kī vīrāniyāñ le jaa.e churā kar koī
isī ummīd pe darvāza khulā rakkhā hai

dair o haram meñ kis liye āvāra-gardiyāñ
jis kī tujhe talāsh hai vo dil ke ghar meñ hai

tanhā.ī kā ġham ruuh ke andar se nikālūñ
āvāz koī de to qadam ghar se nikālūñ

totā bhī panDit ke ghar kā
ik do mantar raT jaatā hai

naqsh-e-ulfat miT gayā to dāġh-e-ulfat haiñ bahut
shukr kar ai dil ki tere ghar kī daulat ghar meñ hai

us din pahlī baar huā thā mujh ko rifāqat kā ehsās
jab us ke malbūs kī ḳhushbū ghar pahuñchāne aa.ī hai

ek to itnā habs hai phir maiñ sāñseñ roke baiThā huuñ
vīrānī ne jhāḌū de ke ghar meñ dhuul uḌaa.ī hai

sair tamāshā rukne vaale sayyāho ye bhī sochā hai
ghaḌiyāñ ghar ko Dhālne vaalā ḳhud hai kitnā tanhā tanhā