Tags-Ghar

ham umr ke saath haiñ safar meñ
baiThe hue jā rahe haiñ ghar meñ

hasrat ko milā hai ḳhāna-e-dil
taqdīr khulī ġharīb ghar meñ

āñkheñ na churāo dil meñ rah kar
chorī na karo ḳhudā ke ghar meñ

'muztar' karo dil hī dil meñ shikve
rah jā.egī baat ghar kī ghar meñ

har ghar kā diyā gul na karo tum ki na jaane
kis baam se ḳhurshīd-e-qayāmat nikal aa.e

ḳhudā ke ghar bhī yuuñ to be-talab jaatā nahīñ koī
bulāoge to haañ 'rif.at' sharīk-e-anjuman hogā

dil-e-harīs se ta.amīr kī havas na ga.ī
vo sat.h-e-āb pe kāġhaz kā ghar banāne lage

shab ghar jo rahā mire vo mehmāñ
thā sub.h ye kis adā se kahnā

thī ye mirī sazā pe maze aa ga.e mire
ik ghar har ek ghar ke pare de diyā gayā

ġharīb-ḳhāne kī ye udāsī ye nā-durustī nahīñ qadīmī
chahal pahal bhī kabhī yahāñ thī kabhī ye ghar bhī sañvar chukā hai

kahāñ liye chalī jaatī hai mujh ko vīrānī
yahīñ kahīñ pe mirā ghar thā kyā huā us kā

kahtā hai tū ki tujh ko paatā nahīñ kabhī ghar
ye jhuuT sach hai dekhūñ aaj apne ghar rahūñgā

le ke dil chain se jā baiThe vo ghar meñ chhup ke
ab to āñkheñ bhī tarasne lagīñ nazzāroñ ko

be-dar-o-dīvār sā ik ghar banāyā chāhiye
koī ham-sāya na ho aur pāsbāñ koī na ho

apnā ghar raushan ho zulmat meñ rahe saarā jahāñ
jaane kin lamhoñ meñ aise faisle karte haiñ log

aap use darbāñ batā.eñ uzr mujh ko kuchh nahīñ
sauñpiye ghar ġhair ko apnī nigahbānī mujhe

ḳhuub rotā huuñ bagūloñ se lipaT kar dasht meñ
yaad aatī hai jo apne ghar kī vīrānī mujhe

jī talak ātish-e-hijrāñ meñ sambhālā na gayā
ghar meñ sab kuchh thā pe ham se to nikālā na gayā

raḳht bāñdhā na kis andoh o ḳhushī ne dil se
ik tire ġham hī kā is ghar se aTālā na gayā

zindagī samjhūñ ise yā ki ise maut kahūñ
vo jo mehmān kī sūrat mire ghar meñ aa.ī