Tags-Gulshan

dam-zadan meñ nahīñ jā.egī bahār-e-gulshan
aable phūTeñge ai ābla-pā āhista

thī mire aane se pahle har taraf chhā.ī ḳhizāñ
sahn-e-gulshan meñ bahār aa.ī mire aane ke ba.ad

vo aa.e to saarā āñgan saarā gulshan mahkegā
un kā jalva ḳhushbū ban kar gul meñ aksar utregā

phūloñ se tāzgī kī harārat ko chhīn kar
mausam ke zahr ke liye gulshan sañvāriye

huuñ vo aasī ki shola-e-dozaḳh
naar hī gulshan-e-ḳhalīl huā

rahūñ gulshan meñ yā sahrā meñ dīvāna hī kahtī hai
ye duniyā kaisī duniyā hai kahīñ jiine nahīñ detī

gul-ruḳhoñ se to huī qat.a umiid
'mehr' nazzāra-e-gulshan hī sahī

zaḳhm haiñ lāla-o-gul partav-e-sehn-e-gulshan
dekhiye dil kā mire rashk-e-gulistāñ honā

aayā gulshan meñ jab vo sarv-e-sahī
gird phirne ko qumriyāñ aa.iiñ

ḳhayālī ġhunche khilā diye haiñ ḳhayālī gulshan sajā diye haiñ
na.e madārī ne do hī din meñ tamāshe kyā kyā dikhā diye haiñ

aap ne jab tavajjoh farmā.ī
gulshan-e-zīst meñ bahār aa.ī

ham ahl-e-dard haiñ taqsīm ho nahīñ sakte
hamārī dāstāñ gulshan meñ Daalī Daalī hai

gulshan meñ phirūñ ki sair-e-sahrā dekhūñ
yā ma.adan o koh o dasht o dariyā dekhūñ

dil meñ ahbāb ke ham ban ke asar baiTheñge
aur uTheñge isī gulshan se bahārāñ ho kar

zamzama-pairā koī to hai yahāñ
sehn-e-gulshan meñ havā maujūd hai

yuuñ to gulshan meñ haiñ sab mudda.ī-e-yak-rañgī
bāvajūd is ke har ik rañg judā lagtā hai

jo tū ne khole havā meñ gesū mahak uThā hai tamām gulshan
hasīn sumbul ke darmiyāñ hai damaktā chehra tirā qayāmat

kahte haiñ ḳhush-qāmat kis ko dekh nikal kar gulshan se
kaise kaise sarv-e-ra.anā chalte haiñ añgāroñ par

gulshan pe udāsī kī fazā dekh rahā huuñ
vo dard ke mausam ko badalne nahīñ dete