Tags-Gulshan

phir laa.ī hai barsāt tirī yaad kā mausam
gulshan meñ nayā phuul khilā dekh rahā huuñ

kāsa-e-dard liye phirtī hai gulshan kī havā
mere dāman meñ tire pyaar kī ḳhushbū bhī nahīñ

maiñ ḳhatāvār huuñ to mujh ko miTā de sayyād
saare gulshan ke liye bā.is-e-āzār na ban

gul sab hañste haiñ bazm-e-gulshan meñ
ishq-e-bulbul magar riyā.ī hai

āshiyānoñ kī ḳhair ho yārab
sahn-e-gulshan meñ raushnī sī hai

aap kahte haiñ ki gulshan meñ hai arzānī-e-gul
apne dāman meñ to kuchh bhī nahīñ ḳhāroñ ke sivā

har sub.h to khilte nahīñ nargis ke hasīñ phuul
har roz to gulshan meñ payambar nahīñ aate

sair-e-gulshan se rahe shaad va-lekin afsos
ab ke ma.alūm kuchh ahvāl qafas kā na huā

apnī shohrat ke liye ḳhushbū ko
sahn-e-gulshan se nikalnā hogā

sunā hai fasl-e-gul aa.ī huī phir gulshan-ārā.ī
chaman meñ kaash apnā bhī qafas ai bāġhbāñ hotā

ye dasht-e-hū sar-e-gulshan kahāñ se aa niklā
ye mo.ajiza hai to ghar se nikal ke dekhte haiñ

maiñ ḳhush huuñ agar gulshan ke liye kuchh merā lahū kaam aa jaa.e
lekin mujh ko Dar hai is kā gulchīñ pe na ilzām aa jaa.e

rut badalne lagī rañg-e-dil dekhnā rañg-e-gulshan se ab haal khultā nahīñ
zaḳhm chhalkā koī yā koī gul khilā ashk umDe ki abr-e-bahār aa gayā

jā.egī gulshan talak us gul kī aamad kī ḳhabar
aa.egī bulbul mire ghar meñ mubārakbād ko

saaqī bahār dar-kaf phuul aa.e mai-kade se
tūfān uTh rahā hai gulshan meñ rañg-o-bū kā

gul yā gulshan se laḌ jaanā khel hai apnī nazroñ kā
aisī ghaḌī allāh na laa.e jab dil se takrār paḌe

jhūmtī hai shāḳh-e-gul khilte haiñ ġhunche dam-ba-dam
bā-asar gulshan meñ tahrīk-e-sabā ho yā na ho

halkī havā ke ik jhoñke meñ kaise kaise phuul gire
gulshan ke gul-posh na jāneñ gulshan saarā jaane hai

aaj kis shoḳh kī gulshan meñ hinā-bandī hai
sarv raqsāñ haiñ gulistān se ham dekhte haiñ

ḳhush-lahnoñ ke liye gulshan bhī kunj-e-qafas ban jaa.e to
jabr ke gun gaate haiñ yā naġhmoñ meñ dard samote haiñ