Tags-Gunah

dam-e-habāb navāzish kī is qadar bārish
gunāhgār bhī jaise gunāhgār nahīñ

uljhe hue haiñ kitne tamannā ke silsile
ai ḳhāliq-e-hayāt gunāhgār kyā kare

rachā huā hai badan meñ abhī surūr-e-gunāh
abhī to ḳhauf nahīñ aa.egā sazā se mujhe

ka.ī savāb to nisyāñ meñ ho ga.e ham se
gunāh kitne hī ham be-irāda karte rahe

jin ke gunāh merī nazar se nihāñ nahīñ
rahte haiñ mujh se dil meñ ḳhafā kis qadar vo log

yuuñ us ke afv kā dāman bhī dāġh-dār na ho
yahī ḳhayāl thā qasd-e-gunāh kyā kartā

kyuuñ mujh se hue gunāh sarzad
kahne ko to be-amal rahā huuñ

maiñ sochtī huuñ ki phir jurm kis ke sar jaa.e
sabhī subūt use be-gunāh karte haiñ

tamām din kisī rahmat kā saaya rahtā hai
ham aadhī raat ko aisā gunāh karte haiñ

use bahisht ke zindāñ meñ bhej denā tum
gunāhgār-e-mohabbat ko ye sazā denā

mere gunāh bhī bahut rahmat-e-kirdgār bhī
ye bhī nahīñ shumār meñ vo bhī nahīñ shumār meñ

apne gunāh pe sharmsār dekh ke mujh ko roz-e-hashr
rahmat-e-haq ne le liyā 'sābir' mujhe kanār meñ

ye qaul hai rahmat-e-ḳhudā kā Daro na tum ai gunāh-gāro
shumār-e-isyāñ agar nahīñ hai hisāb ham le ke kyā kareñge

maiñ tujhe ḳhudā samajh kar na gunāhgār hotā
agar ek be-niyāzī hī tirā ash.ār hotā

gunāhgār fazāoñ kī qatl gāhoñ meñ
haqīqatoñ kā pata hai na dāstāñ baaqī

rasm-e-andesha kī taqrīb-e-mulāqāt se fāriġh hue ham
rasm-e-andesha kisī aur zamāne kā gunāh

huā kuchh is tarah insāf bhī ravā 'jamshed'
ki munsifoñ se dil-e-be-gunāh Darne lagā

use sharāb-e-tuhūrā kā tazkira bhī gunāh
ye baat aur hai sab ko nashe meñ rakhtī hai

mire gunāh kī mujh ko sazā nahīñ detā
mirā ḳhudā kahīñ nārāz to nahīñ mujh se

'anvar' gunāhgār o ḳhatā-vār hī sahī
sar-tāba-pā atā hī atā ho ga.e ho tum