Tags-Gunah

hamesha afv tirā hai gunāh kā haamī
hamesha rahm tujhe mere haal par aayā

daaġh hai mujh pe ishq kā merā gunāh bhī to dekh
us kī nigāh bhī to dekh jis ne ye gul khilā diyā

zauq-e-nigāh ke sivā shauq-e-gunāh ke sivā
mujh ko butoñ se kyā milā mujh ko ḳhudā ne kyā diyā

maiñ gunāhgāroñ meñ sāhab-e-tarīqat huuñ
dāḳhilī shahādat par merā sar qalam karnā

gunāhgāroñ kī uzr-ḳhvāhī hamāre sāhib qubūl kiije
karam tumhāre kī kar tavaqqo.a ye arz kiite haiñ maan liije

dāman hazār chaak garebāñ hazār vā
ye dekhnā hai kitnā gunāhgār kaun hai

azmat-e-rahmat-e-ḳhudāvandī
ārzū-e-gunāh se pūchho

farishte hashr meñ pūchheñge pāk-bāzoñ se
gunāh kyuuñ na kiye kyā ḳhudā ġhafūr na thā

ek navā-e-ātishīñ halqa-ba-halqa jism meñ
phir huī hai tāza-dam taaza gunāh ke liye

ishq meñ vo bhī ek vaqt hai jab
be-gunāhī gunāh hai pyāre

kyā lazzat-e-gunāh se dil āshnā nahīñ
sharminda mere haal pe tū ho rahā hai kyuuñ

tire karam ke bharose pe mutma.in huuñ maiñ
ye jāntā huuñ ki mujh sā gunāhgār nahīñ

us shoḳh ḳhud-pasand se pūchhe koī sahī
sābit huā hai qatl mirā kis gunāh se

jazā-sazā se kahīñ māvarā hai merā amal
ye kār-e-ishq musalsal gunāh thoḌī hai

ye aadmī hī binā-e-shar hai jo apnī hastī se be-ḳhabar hai
gunāh kā naam tak kahāñ thā vajūd-e-nau-e-bashar se pahle

zamīn mujh ko samajhtī na āsmāñ koī
gunāhgār hī kahlātā maiñ jahāñ jaatā

ab kaheñ kis se ki un se baat karnā hai gunāh
jab kalām aayā zabāñ par lā-kalām aa hī gayā

ye rasm barham fanā hai ai dil gunāh hai jumbish nazar bhī
rahegī kyā aabrū hamārī jo tū yahāñ be-qarār hogā

nahīñ hai dozaḳh kā dil ko kuchh ġham mirī bhī sun nāsehā zarā tham
rahīm vo pur-gunāh haiñ ham azaab kaisā savāb kaisā

Tuk aañkh uThā ke jo dekhā nazar se de paTkā
na thī ye 'azfarī' itnī gunāh kī ta.azīr