Tags-Gunah

mumkin hai farishtoñ se koī sahv huā ho
maiñ itnā gunāhgār kabhī ho nahīñ saktā

ijz-e-gunāh ke dam tak haiñ ismat-e-kāmil ke jalve
pastī hai to bulandī hai rāz-e-bulandī pastī hai

jur.at-e-lams bhī imkān-e-talab meñ hai magar
ye na ho aur gunāhgār banā do ham ko

ye bhī to kam nahīñ hai kī ham ne koī gunāh
ik baar ho gayā to dobāra nahīñ kiyā

yuuñ to is be-ḳhudī ke mas.ale meñ
sab gunāh jaam kā nahīñ hotā

butoñ ko puuj rahā hai tire tasavvur meñ
gunāh kar ke bhī 'faizī' gunāhgār nahīñ

us ke ashkoñ kā gunāhgār maiñ ho jā.ūñgā
vo mujhe yaad agar kar ke sisaktā hogā

phir dāvat-e-gunāh milī ik nigāh se
phir merī pārsā.ī ko sharmānā chāhiye

vo masti-e-nazar hai usī dil kī pāsdār
jo dil ba-rū-e-kār gunāh-e-nazar meñ hai

'momin' is zehn-e-be-ḳhatā par haif
fikr āmurzish-e-gunāh na kī

sab ahl-e-hashr jab apne kiye ko pā.eñge
baḌā mazā ho jo mujh ko mirā gunāh mile

qarīb-e-mai-kada mujh ko jo ḳhānqāh mile
gale savāb ke kyā kyā mire gunāh mile

hujūm-e-hashr meñ apne gunāhgāroñ ko
tire sivā koī aisā nahīñ jo pahchāne

kuchh mirī be-qarāriyāñ kuchh mirī nā-tavāniyāñ
kuchh tirī rahmatoñ kā hai haath mire gunāh meñ

ye misra-e-soz sun ke 'hātim' kahe hai nāseh se ai azīzo
umīd-e-baḳhshish hai jab se ham ko kiye haiñ ham ne gunāh lākhoñ

sambhal hī leñge musalsal tabāh hoñ to sahī
azāb-e-zīst meñ rashk-e-gunāh hoñ to sahī

kyā jaane rahmatoñ ne liyā kis tarah hisāb
do chaar bhī gunāh na nikle shumār meñ

ifrāt-e-ma.asiyat se fazīlat milī mujhe
maiñ huuñ gunāhgāroñ kī pahlī qatār meñ

chāqū pe hai nishān kisī be-gunāh kā
qātil to haath meñ liye ḳhanjar chalā gayā

gin to lete haiñ uñgliyoñ pe gunāh
rahmatoñ kā hisāb kaun kare