Tags-Gunah

kal tujhe kuchh gunāh karne haiñ
aaj kār-e-savāb kar lenā

adā-e-husn kī ma.asūmiyat ko kam kar de
gunāhgār-e-nazar ko hijāb aatā hai

kyā kījiye kashish hai kuchh aisī gunāh meñ
maiñ varna yuuñ fareb meñ aatā bahār ke

yuuñ ḳhushbuoñ meñ Dubo.e hue rakhūñ kab tak
gunāh kyuuñ na maiñ kar luuñ qubūl hāthoñ kā

tire badalne ke bā-vasf tujh ko chāhā hai
ye e'tirāf bhī shāmil mire gunāh meñ hai

merī ḳhud-āgahī bhī kī tere visāl ne talab
hijr-e-hazār-shab ke ba.ad ek gunāh ke liye

ik shab-e-ḳhud-numā.ī meñ ismat-e-be-maqām ne
kitne savāl kar liye ramz-e-gunāh ke liye

yuuñ to diye fareb kisī aur ne unheñ
lekin gunāhgār mirī zaat ho ga.ī

yaañ ham ko diyā kyā jo vahāñ par ho nigāh
taa.at se kuchh ummīd na kuchh ḳhauf-e-gunāh

maiñ ma.arifat ke huuñ ab us maqām par ki jahāñ
kiyā gunāh bhī to ḳhadsha-e-savāb rahā

thī nigāh pahle to us kī vuuñ kahīñ dostī meñ huā hai yuuñ
diyā us ne dil kahīñ aur kyuuñ yahī 'mus.hafī' kā gunāh hai

kis vāste boltā nahīñ tū
kyā mujh se huā gunāh zālim

kisī ke kam haiñ kisī ke bahut magar zāhid
gunāh karne ko kyā pārsā nahīñ karte

ḳhudāyā kaash tujhī ko gavāh kar lete
nigāh-e-ḳhalq se bach kar gunāh kar lete

dil hai shauq-e-gunāh se labrez
dekhne hī kā pārsā huuñ maiñ

tum jaano tum ko ġhair se jo rasm-o-rāh ho
mujh ko bhī pūchhte raho to kyā gunāh ho

ik raat aap jism-e-ḳhudā ban ke aa.iye
aur ham gunāhgār hoñ pahlū meñ aap ke

had-e-shumār se bāhar haiñ jab gunāh mire
hisāb ke liye yuuñ be-hisāb kyā ma.anī

naubat to kahīñ qatl-e-gunāhgār kī aa.ī
naqqāre bajā.uñgā meñ tīroñ kī sarī se

us qulzum-e-gunāh meñ Duubā huā huuñ maiñ
jis meñ hai ek mauja-e-dāmān-e-tar sharāb