Tags-Gunah

manzil hai apnī apnī 'qalaq' apnī apnī gor
koī nahīñ sharīk kisī ke gunāh meñ

māyūs 'mujīb' itnā bhī na ho laġhzish to gunāh-e-ādam hai
manzil kī talab to mohkam hai idrāk-e-safar mohkam na sahī

huuñ munfa.il zarūr magar ai gunāh-e-ishq
ab ashk bhī nahīñ haiñ jo dāman ko tar kareñ

ik lazzat-e-gunāh thī kyā lazzat-e-gunāh
tā-umr raas aa.ī na phir bandagī mujhe

pakḌe jā.eñge hamīñ hashr meñ be-jurm-o-qusūr
aur gunāhgār ko duniyā meñ sazā kuchh bhī nahīñ

koī batā.e hamārī samajh se bāhar hai
kise gunāh kaheñ kyā savāb hai maulā

gunāh jitne bhī mere haiñ sab shumār meñ haiñ
tirā karam to magar be-hisāb hai maulā

rahmat agar qubūl kare kyā ba.iid hai
sharmindagī se uzr na karnā gunāh kā

duniyā se jab ravāna hue ham gunāhgār
sar muñh chhupā.e sharm ke maare chale ga.e

juuyā gunāhgār hai lutf-e-karīm kā
lutf-e-karīm ko hai gunahgār kī talāsh

nā-umīd ahl-e-ḳharābāt nahīñ rahmat se
baḳhsh degā vo karīm apne gunāhgāroñ ko

gunāh apne mujhe yaad aa.e 'vahshat'
ḳhajil sā rah gayā maiñ haath uThā kar

rūThe hue the aap manāne ke vāste
ye mujrim-e-gunāh-e-tamannā phir aa ga.ī

ashshaiḳh vaqt kyā ye hamārā qusūr hai
lazzat meñ hai gunāh to lazzat gunāh meñ

ise kaheñ haiñ sunā hogā shaiḳh ḳhauf o rajā
udhar tū tauba idhar maiñ gunāh kartā huuñ

tire gunāh se parda zarūr uTThegā
abhī to ḳhair koī bhī uThā nahīñ rahā hai

us vaqt mujh ko dāvat-e-jām-o-subū milī
jis vaqt maiñ gunāh ke qābil nahīñ rahā

zulmateñ to charāg-e-ḳhema thiiñ
ḳhalvatoñ ke gunāhgār the ham

badal chuke haiñ sab aglī rivāyatoñ ke nisāb
jo the savāb-o-gunah ho ga.e gunāh-o-savāb

'aḳhtar' gunāh karne se phir roktā thā kaun
maiñ kaise maan luuñ ki vahāñ par ḳhudā na thā