Tags-Gunah

maiñ to hastī ko samajhtā huuñ sarāsar ik gunāh
pāk-dāmānī kā da.avā ho to kis buniyād par

gunāh meñ bhī baḌe ma.arifat ke mauqe haiñ
kabhī kabhī use be-ḳhadsha-e-najāt to dekh

yuuñ zindagī guzār rahā huuñ tire baġhair
jaise koī gunāh kiye jā rahā huuñ maiñ

sazā ke jhelne vaale ye sochnā hai gunāh
koī qusūr bhī tujh se kabhī huā ki nahīñ

tum ko 'mā.il' bahut hai sharm-e-gunāh
rāt-din munfa.il tumhīñ to ho

vo jo raat mujh ko baḌe adab se salām kar ke chalā gayā
use kyā ḳhabar mire dil meñ bhī kabhī ārzū-e-gunāh thī

pisvā.ūñ be-gunāh jo dil ko hinā ke saath
pursān-e-hāl ho koī aadil to kyā karūñ

maiñ tere ishq se pahle gunāh kartā thā
mujhe diyā gayā dilkash azaab ya.anī tū

daur hai parindoñ kā chheḌ hai sitāroñ se
kā.enāt aajiz hai ham gunāhgāroñ se

ba-chashm-e-ġhaur jo dekho to aur bhī kuchh hai
faqat gunāh nahīñ aadmī ke dāman meñ

ab kaheñ kis se ki un se baat karnā hai gunāh
jab kalām aayā zabāñ par lā-kalām aa hī gayā

ham apnī be-gunahī ko gunāh kahte the
bigaḌ ga.e ye gunāhgār kaun aap kā hai

maulā madad ki maiñ huuñ azādār-e-āl-e-ū
aaqā tire baġhair gunāhgār kyā kare

ye banda-e-ḳhāksār ya.anī 'nāzim'
aasī o gunāhgār ya.anī 'nāzim'

un ko gunāh karte hue maiñ ne jā liyā
phir un ke saath maiñ bhī gunahgār ho gayā

āshiq mujhe jaan karte haiñ qatl
taqsīr o gunāh dekhiyegā

be-jurm-o-be-gunāh ġharīb-ul-vatan kiyā
ham ko vatan se shaah ġharīb-ul-vatan kiyā

ham se gunāhgār bhī us ne nibhā liye
jannat se yuuñ zamīn ko behtar likheñge ham

sūrat-e-barg-e-ḳhizāñ jhaḌte haiñ har gaam gunāh
jab uThāte haiñ tirī raah meñ zavvār qadam

gunāh aur hasīñ, ahrman ke bas meñ nahīñ
sitam-zarīf koī banda-e-ḳhudā hī na ho