Tags-Hasrat

ġham mujhe hasrat mujhe vahshat mujhe saudā mujhe
ek dil de kar ḳhudā ne de diyā kyā kyā mujhe

ai ḳhizr aa.e lutf kyā mashrab alag maslak judā
marne kī hasrat mujh ko hai tum ko hai jiine kī havas

saañs un ke marīz-e-hasrat kī ruk ruk ke chaltī jaatī hai
māyūs nazar hai dar kī taraf aur jaan nikaltī jaatī hai

masnad-e-shāhī kī hasrat ham faqīroñ ko nahīñ
farsh hai ghar meñ hamāre chādar-e-mahtāb kā

dast-e-sāqī par lagā.e aañkh rahtā hai mudām
jām-e-mai hai dīda-e-hasrat kisī mai-ḳhvār kā

jab dam-e-naz.a na aayā vo sitamgar to 'nazīr'
mar gayā kah ke ye hasrat-zada ai vaah miyāñ

na khol ai yaar merā gor meñ muñh
ki hasrat hai mirī jaagā kafan meñ

ḳhvāb hasrat ashk uljhan nāla-o-faryād-o-ġham
kisht-e-jāñ meñ roz fasl-e-dard ugtī hai miyāñ

tasavvurāt ke hasrat-kade meñ kaun aayā
charāġh tā-had-e-ehsās jalte jaate haiñ

ik ajnabī miltā hai baḌe pyaar se 'aḳhtar'
kyā vo bhī koī hasrat dil-gīr liye hai

jis chāñd ke dīdār kī hasrat meñ hai duniyā
vo shaam Dhale ghar mire utrā hai ka.ī baar

hai agar us kī ye hasrat ki use sab dekheñ
shāhid-e-charḳh ho rū-posh ghaTā meñ pahle

kahne ko lafz do haiñ ummīd aur hasrat
in meñ nihāñ magar ik duniyā kī dāstāñ hai

idhar mausam kī ye ḳhush-e-ehtimāmī
udhar rindoñ kī ye hasrat-bajāmī

aañkh kī tasvīr sar-nāme pe khīñchī hai ki tā
tujh pe khul jaave ki is ko hasrat-e-dīdār hai

dil jo rūThā to manāne se kahīñ mantā hai
ye sitam bā.is-e-hasrat tujhe ai jaañ hoñge

shauhar kī nazar hasrat se bharī uThtī hai to ḳhud jhuk jaatī hai
ehsās-e-mohabbat kī duniyāñ us manzar se tharrātī hai

dil-e-muztar meñ jaltī ek hasrat aur rakhnī hai
mujhe tāq-e-junūñ meñ ik mohabbat aur rakhnī hai

ham ki mauhūm sī hasrat bhī liye phirte haiñ
kitne haiñ jin kī har ik ḳhvāhish-e-bejā niklī

koī hasrat bhī nahīñ koī tamannā bhī nahīñ
dil vo aañsū jo kisī aañkh se chhalkā bhī nahīñ