Tags-Hasrat

ḳhuuñ rulātī hai tirī hasrat-e-dīdār mujhe
terī furqat ne kiyā jaan se bezār mujhe

kyuuñ na us hasrat se merā shīsha-e-dil chuur ho
baaġh thā saaqī thā sabza thā havā thī maiñ na thā

ġham us ko hasrat-e-parvāna kā hai ai sho.ale
tire larazne se zāhir hai nā-tavānī-e-sham.a

aayā hai ik rāh-numā ke istiqbāl ko ik bachcha
peT hai ḳhālī aañkh meñ hasrat hāthoñ meñ gul-dasta hai

bharī jo hasrat-o-yās apnī guftugū meñ hai
ḳhudā hī jaane ki banda kis aarzū meñ hai

hasrat ne lā rakhā tirī bazm-e-ḳhayāl meñ
gul-dasta-e-nigāh suvaidā kaheñ jise

hai chashm-e-tar meñ hasrat-e-dīdār se nihāñ
shauq-e-ināñ guseḳhta dariyā kaheñ jise

ab tak vahī ronā hai vahī hasrat-e-dīdār
ham mar ga.e is par bhī ye kāfir na marī aañkh

mustaqil harārat hai
hasrat-o-tamannā ke

agar tū chāhe to ġham vaale shādmāñ ho jaa.eñ
nigāh-e-yār ye hasrat nikal to saktī hai

hasrat hai shahr-e-yār meñ marnā nasīb ho
jagmag huā to kyā huā vīrāñ huā to kyā

haa.e us gul-badan kī hasrat meñ
yuuñ bhaTaknā na thā magar bhaTke

din meñ bhī hasrat-e-mahtāb liye phirte haiñ
haa.e kyā log haiñ kyā ḳhvāb liye phirte haiñ

baaqī rahī hai dil meñ ye hasrat tamām umr
'mahtāb' kā dayār ho us kī galī ke saath

samajhte ho jinheñ tum sañg-e-mīl ai qāfile vaalo
sar-e-rah ḳhastgān-e-hasrat-raftār baiThe haiñ

dil talabgār-e-tamāshā kyuuñ thā
ya.anī hasrat-kash-e-duniyā kyuuñ thā

dil meñ hasrat basā to lī hai magar
ye kaḌī silsila na ho jaa.e

jab hasrat-o-armāñ miT jaa.eñ kuchh aas na ho kuchh yaas na ho
jab maut kī niiñd aa.e dil ko bedār mohabbat hotī hai

badla ye liyā hasrat-e-iz.hār se ham ne
āġhāz kiyā apne hī inkār se ham ne

yaar se chheḌ chalī jaa.e 'asad'
gar nahīñ vasl to hasrat hī sahī