Tags-Hasrat

thā sail-e-hasrat-e-dil dushman-e-hayāt magar
rah-e-baqā bhī usī meñ thī haT ke dekhte kyā

dil-e-dard-mañd ko aaj bhī hai 'mujīb' hasrat-e-rāz-dāñ
maiñ vo ek naġhma-e-ārzū ki ḳhud apne lab pe harām huuñ

sayyād na ab be-par-o-bāloñ ko tū ab chhoḌ
phir hasrat-e-gul degī hameñ saḳht aziyyat

uThā.e phir rahā huuñ hasrat-e-tāmīr kī īñTeñ
jahāñ saaya nahīñ hotā vahīñ dīvār kartā huuñ

āġhosh kī hasrat ko bas dil hī meñ māruñgā
ab haath tirī ḳhātir phailā.ūñ to kuchh kahnā

kyā ho qasd nikal jaane kā ghar pā kar ab shaad hai kyā kyā
armāñ armāñ hasrat hasrat kis kī badaulat dil kī badaulat

sab se ulfat sab kī hasrat kis kī badaulat dil kī badaulat
Dāvāñ-Dol hai merī niyyat kis kī badaulat dil kī badaulat

dariyā meñ vo dhoyā thā kabhī dast-e-hinā.ī
hasrat se vahīñ panja-e-marjāñ meñ lagī aag

kis se kahiye ki zamāne ko garāñ guzrā hai
vo fasāna ki mirī hasrat-e-guftār meñ thā

aayā na vo shoḳh aur ga.e aah
hasrat hī bhare tah-e-zamīñ ham

dard-o-rañj-o-alam o hasrat-o-dāġh o ġham-o-rashk
mujh ko kyā kyā na tire ishq meñ āzār mile

kaisī tābīr kī hasrat ki 'ziyā' barsoñ se
nā-murād āñkhoñ ne dekhā hī nahīñ ḳhvāb koī

pā-bos-e-yār kī hameñ hasrat hai ai nasīm
āhista ā.īyo tū hamāre mazār par

DabDabāte hī āñkheñ pathrā.ī
kyā hī hasrat bharī thī aañsū meñ

dil jo ghabrā.e qafas meñ to zarā par kholūñ
zor itnā bhī na ai hasrat-e-parvāz aayā

aa.e vo naza.a meñ bhī na hasrat nikālne
ab zer-e-ḳhāk le ke sab armān jā.iye

garmī-e-hasrat-e-nākām se jal jaate haiñ
ham charāġhoñ kī tarah shaam se jal jaate haiñ

ālām-e-zamāna se chhūTeñ to tujhe chāheñ
masrūf-e-mashaqqat haiñ hasrat se bharī bāñheñ

hasrat shabāb kī hai ayyām-e-sheb meñ bhī
ma.adūm kī havas hai zaa.il ko DhūñDte haiñ