Tags-Hasrat

duur baḌhtā hī gayā hasrat-e-nākām ke saath
dil meñ ik Tiis uThī aap ke hañgām ke saath

aap ne pursish-e-ġham kā bhī takalluf na kiyā
dil meñ ham jalte rahe hasrat-e-nākām ke saath

hasrat hai is ke dekhne kī dil meñ be-qayās
aġhlab ki merī āñkheñ raheñ baaz mere ba.ad

piye jaate haiñ vaañ hasrat lahū insāñ hī insāñ kā
maiñ bhūle se bhī us jānib gayā to maarā jā.ūñgā

bazm meñ dekh ke hasrat se kisī ko chup huuñ
dar-haqīqat yahī andāz-e-savāl achchhā hai

hasrat-e-shahr-e-nasībāñ kyā tujhe ma.alūm bhī hai
dasht hai ābād ya.anī ishq ke ghar se ziyāda

nāhaq 'sirāj' āh-e-hasrat kī ātish señ har dam meñ sau baar jumbāñ sabab kiyā
yakbār sho.ale pe girne kī tarhoñ kuuñ ma.alūm karne patañgoñ meñ rahiye

hasrat bharī nazar se vo dekhtā hai mujh ko
kuchh boltā nahīñ hai bas sochtā hai mujh ko

dil meñ vaqt-e-zab.h hai hasrat ki tum ko dekh leñ
marte marte ḳhair jiine kī tamannā bhī sahī

aañkh mar to jaatī hai jiine kī tamannā meñ
aur vo nahīñ martā jo hai ḳhvāb hasrat kā

ashk hai tel shab-e-hijr meñ ai jān-e-'sirāj'
har palak hasrat-e-zaitūn hai vattīñ kī qasam

aarzū tak ho ga.ī dil ke liye bār-e-garāñ
nā-tavānī ke sabab armāñ bhī hasrat-ḳhez hai

ek dil hai ek hasrat ek ham haiñ ek tum
itne ġham kam haiñ jo koī aur ġham paidā kareñ

yās-o-ummīd hasrat-o-armāñ
zindagī ke naqīb hote haiñ

hasrat-o-armāñ bazm-e-tasavvur dāman-e-sahrā dast-e-junūñ
ḳhushiyoñ ke paiġhām haiñ 'ḳhālid' ġham ke hasīñ lamhāt ke naam

dil ke kahne se abas us kī tamannā kī thī
hasrat-e-rañg-e-bahārāñ na tujhe hai na mujhe

maiñ hañstī kheltī huuñ jis ke ḳhvāb nā-rasā meñ
mirā ehsās hasrat hai magar kitnā hasīñ hai

riste raheñge dīda-e-hasrat se umr bhar
'zulfī' jo zaḳhm pā-e-talab se chimaT ga.e

ek ik shakl ko dekhā hai baḌī hasrat se
ajnabī kaun hai aur kaun shanāsā na khulā