Tags-Hasrat

jinheñ hāsil hai terā qurb ḳhush-qismat sahī lekin
terī hasrat liye mar jaane vaale aur hote haiñ

chale jaanā magar sun lo mire dil meñ ye hasrat hai
faqat ik baar hī kah do hameñ tum se mohabbat hai

tishnagī meñ yaas o hasrat ke charāġh
ġham-kade meñ apne jal jaayā kiye

ashk-e-hasrat nikal ke dāman meñ
jaan se haath dho.e aate haiñ

hasrat-o-yās ko laḌiyoñ meñ piro kar buḌhiyā
mere bachpan se vahī haar liye phirtī hai

kal tak thī dil meñ hasrat-e-āzādī-e-qafas
āzād aaj haiñ to ġham-e-bāl-o-par hai aaj

terā armāñ tirī hasrat ke sivā kuchh bhī nahīñ
dil meñ ab terī mohabbat ke sivā kuchh bhī nahīñ

kyuuñ na un donoñ pe miTne kī ho hasrat aḳhtar
uf vo us raat kī baat aah vo us baat kī raat

tirī taraf hai ba-hasrat nazāra-e-nargis
ba-korī-e-dil-o-chashm-e-raqīb sāġhar khīñch

us ko Thahar ke dekhte hasrat hī rah ga.ī
vo daf.atan milā thā achānak bichhaḌ gayā

maiñ hairat o hasrat kā maarā ḳhāmosh khaḌā huuñ sāhil par
dariyā-e-mohabbat kahtā hai aa kuchh bhī nahīñ pāyāb haiñ ham

faqīr-e-ishq huuñ kashkol-e-dil meñ hasrat hai
gadāgarī kā mahāsil bhī tere naam karūñ

dil miT gayā to ḳhair zarūrat nahīñ rahī
hasrat ye rah ga.ī hai ki hasrat nahīñ rahī

raat tire ḳhvāboñ ne mujh par yuuñ arzānī kī
saarī hasrat nikal ga.ī mirī tan-āsānī kī

jaane kis aalam kī hasrat meñ haiñ nazreñ muztarib
varna kyā nazzāra-e-husn-e-do-ālam kījiye

kiyā hasrat se ruḳhsat sub.h ke tāroñ ko ye kah
ki jis kā shaam se thā aasrā ab tak nahīñ aayā

dilbar kī tamannā-e-bar-o-dosh meñ mar jaa.e
kyā yūñhī koī hasrat-e-āġhosh meñ mar jaa.e

ham Duub kar mareñge hasrat rahegī tujh ko
jab ḳhaak hī na hogī barbād kyā karegā

lagī haiñ maut par āñkheñ magar hai diid kī hasrat
ye vaqt-e-naz.a hai āñkhoñ meñ dam yuuñ bhī hai aur yuuñ bhī