Tags-Hasrat

uf vo ik harf-e-tamannā jo hamāre dil meñ thā
ek tūfāñ thā ki barsoñ hasrat-e-sāhil meñ thā

hasrat rahī ki sūrat-e-āb-e-ravāñ chaleñ
kab se misāl-e-sañg paḌe haiñ Dhalān par

ba.ad tauba ke bhī hai dil meñ ye hasrat baaqī
de ke qasmeñ koī ik jaam pilā de ham ko

dil meñ the shoa.la-fishāñ hasrat-o-armāñ shab-e-ġham
saiñkaḌoñ sham.a farozāñ thiiñ siyah-ḳhāne meñ

tujh se mil kar bhī ġham-e-hijr kī talḳhī na miTī
ek hasrat sī ye andāz-e-digar hai ki jo thī

āshuftagī-e-vahshat kī qasam hairat kī qasam hasrat kī qasam
ab aap kaheñ kuchh yā na kaheñ ham rāz-e-tabassum pā bhī ga.e

jaañ se aziiz dil ko rakhtā huuñ aadmī huuñ
kyūñ-kar kahūñ maiñ mujh ko hasrat nahīñ hai koī

kyuuñ jān-e-hazīñ ḳhatra-e-mauhūm se nikle
kyuuñ nāla-e-hasrat dil-e-maġhmūm se nikle

hijr meñ sone kī aisī hī tamannā ai 'vazīr'
dekhtā huuñ us ko hasrat se jise aatī hī niiñd

hai jo ehsān to kuchh hasrat jāved kā hai
varna pās-e-dil-e-nāshād kiyā hai kis ne

siine meñ uchhal rahī hai hasrat merī
āñkhoñ meñ taḌap rahī hai hairat merī

vus.at-e-āsmāñ sub.h-e-parvāz kā koī muzhda sunā
shāḳh-e-hasrat pe baiThe hue tā.ir-e-be-navā ke liye

hasrat hai ki yuuñ luTe chaman aur
gul ham ko na deve bāġhbāñ ek

'humāyūñ' terā dil bhī gulshan-e-hasrat kā naġhma hai
ḳhushī meñ bhī tirī bāteñ vo ġham-afzā nahīñ jātīñ

mar jā.egā dil hasrat-e-anvār-e-sahar meñ
be-parda agar tum ruḳh-e-zebā na karoge

hasrat ke daaġh dast-e-talab se nahīñ dhule
bhārī the ḳhvāb aañkh se puure nahīñ tule

tumhārī hasrat-e-dīdār barqarār rahe
hazār saal bhī guzrīñ to kuchh hisāb nahīñ

vo sitāra huuñ jo chamkā bhī na ho aur TuuT jaa.e
jis ke dil meñ bujh ga.ī ho hasrat-e-tābindagī

intihā-e-nā-umīdī dekhiye
jo tamannā thī vo hasrat ho ga.ī