Tags-Hasrat

ibtidā vo thī ki jiine ke liye martā thā maiñ
intihā ye hai ki marne kī bhī hasrat na rahī

ye dāman-e-hasrat hai vahī ḳhvāb-e-gurezāñ
jo apne liye hai na zamāne ke liye hai

apnī hasrat to vo puurī kar le
dushman-e-jāñ ko duā bhī dūñgā

dil-e-āshiq meñ hasrat bhī hai armāñ bhī tamannā bhī
vo jis bastī meñ rahte haiñ baḌī ābād bastī hai

tū use aa kar jagā jā
hasrat-e-dil so rahī hai

kahte haiñ ik fareb-e-musalsal hai zindagī
us ko bhī vaqf-e-hasrat-o-hirmāñ banā diyā

allāh rī be-naqābī us jān-e-mudda.ā kī
merī nigāh-e-hasrat hairān ho na jaa.e

rahī jo un se tumheñ kudūrat to baḌh ga.ī vahshiyoñ kī vahshat
uḌaa.ī is darja ḳhāk-e-hasrat kamar kamar tak gaḌe hue haiñ

dil ko jis chiiz kī hasrat hai hamīñ jānte haiñ
vo koī chāñd sī sūrat hai hamīñ jānte haiñ

hasrat-e-zohra-vashāñ sarv-qadāñ hai ki jo thī
apnā sarmāya-e-dil yād-e-butāñ hai ki jo thī

dil kī shaguftagī ke saath rāhat-e-mai-kada ga.ī
fursat-e-mai-kashī to hai hasrat-e-mai-kashī nahīñ

chāhat kī ab to koī bhī hasrat nahīñ rahī
sarsabz us kī yaad se phir bhī hai bāġh-e-dil

hāsil-e-ishq tirā husn-e-pashemāñ hī sahī
merī hasrat tirī sūrat se numāyāñ hī sahī

lagī dil kī bujhā.e bekasī meñ kaun hai aisā
magar ik girya-e-hasrat ki be-tābāna aatā hai

rāt-bhar baiThe rahe muntazarī meñ us kī
sub.h jab ho ga.ī hasrat se bichhaunā ulTā

vo phuul huuñ jo khilā ho ḳhizāñ ke mausam meñ
tamām umr mujhe hasrat-e-bahār rahī

dil nahīñ hai vo nahīñ hai ishq kā jis meñ guzar
vo bhī koī aañkh hai jis aañkh meñ hasrat nahīñ

'jalīl' ik sher bhī ḳhālī na paayā dard o hasrat se
ġhazal-ḳhvānī nahīñ ye dar-haqīqat nauha-ḳhvānī hai