Tags-Hasrat

rulā.e jaatī hai un kī hasrat chalī hī aatī hai mujh ko riqqat
raheñgī kaahe ko merī āñkheñ jo yūñhī aañsū bahā kareñge

lazzat-e-dard se āsūda kahāñ dil vaale
haiñ faqat dard kī hasrat meñ karāhe jaate

kuchh aise taur se chamkā hai dil kā dāġh-e-shikast
ki aaj tak nahīñ hasrat-kash-e-rafū bhī maiñ

yādoñ se kaho solā-siñgār aaj karā.eñ
ā.īnā-ba-kaf hasrat-e-dīdār khaḌī hai

kis muñh se ġham ke zabt kā daavā kare koī
tāqat ba-qadr-e-hasrat-e-rāhat nahīñ rahī

ai arz-e-shauq muzhda ki dil chaak ho gayā
taklīf parda-dāri-e-hasrat nahīñ rahī

vo ahd-e-dil-farebi-e-tāsīr ab kahāñ
muddat se aah aah kī hasrat nahīñ rahī

is adā se dam-e-raftār qayāmat aa.ī
aise ham kyuuñ na hue un ko ye hasrat aa.ī

ban kar mirā apnā vo banā hasrat-e-jāved
thā ḳhaak kā putlā hī muqaddar to nahīñ thā

asar-e-ishq se huuñ sūrat-e-sham.a ḳhāmosh
ye muraqqa.a hai mirī hasrat-e-goyā.ī kā

hasrat-e-pā.emāl meñ gum haiñ
ham fareb-e-ḳhayāl meñ gum haiñ

kuchh na niklā dil meñ dāġh-e-hasrat-e-dil ke sivā
haa.e kyā kyā tohmateñ thiiñ aadmī ke naam par

dekhā na maiñ juz-sāya-e-bāzū-e-shikasta
hirmāñ-zada juuñ hasrat-e-be-bāl-o-parī huuñ

pal bhar meñ bikhar jā.eñge miTTī ke gharauñde
bachchoñ kī magar hasrat-e-tāmīr to dekho

ābād kiyā dil ko hañgāma-e-hasrat se
sahrā-e-tag-o-dau ko vīrān bahut rakkhā

ḳhudā hasrat-zada dil kī tamannāoñ se vāqif hai
duā.eñ roz-o-shab kartī huī saa.il hai tanhā.ī

aañkh jhuk jaatī nazar aatā agar tū ḳhvāb meñ
tere ḳhāl-e-ruḳh se yūsuf dāġh-e-hasrat māñgtā

tum salāmat raho zinda hai tumhīñ se ulfat
haath uThā kar tumheñ hasrat ye duā detī hai

dekhiye gul kī mohabbat hameñ kyā detī hai
bulbul-e-zār ye hasrat se sadā detī hai

ik ishq kā ġham aafat aur us pe ye dil aafat
yā ġham na diyā hotā yā dil na diyā hotā