Tags-Hasrat

kuchh nahīñ kar saktā 'anjum' aap kā
āsmāñ ko hai jo hasrat par ghamanD

hasrat to hai yahī ki ho duniyā se dil ko mel
ho jis se dil ko mel vo duniyā kahāñ se laa.eñ

maiñ is duniyā ke mele meñ
khilaunoñ ki dukānoñ par saje ek ik khilaune ko baḌī hasrat se taktā jā rahā huuñ

merī hasrat thī kabhī tū māh-vash
mujh ko terī aarzū honā paḌā

yārab kahāñ le jā.ūñ maiñ hasrat-zada dil ko
ye laash to ab mujh se uThā.ī nahīñ jaatī

na baaz rakh ham ko rone se tū gireñ jo ashkoñ ke daane bahattar
ye kisht-e-hasrat meñ apnī hamdam umiid kā tuḳhm bo rahe haiñ

shauq hasrat ke sharāroñ se jilā paatā hai
jān-e-jāñ dushman-e-jāñ ho to ġhazal hotī hai

umr-bhar har ek se maiñ ne chhupā.e dil ke daaġh
aaj ye hasrat ki koī dekhne vaalā mile

hameñ miT ke bhī ye hasrat ki bhaTakte us galī meñ
vo haiñ kaise log yā rab jo qayām chāhte haiñ

naale ko usī dil meñ utar jaane kī hasrat
aur nai ko usī bhūlne vaale kā gilā thā

ik mirā sar ki qadam-bosī kī hasrat is ko
ik tirī zulf ki qadmoñ se lagī rahtī hai

zanjīr kī jhankār se ābād haiñ zindāñ
ham lazzat-e-guftār kī hasrat nahīñ karte

nisf shab tak dī tasallī phir vo yūsuf uTh gayā
ḳhvāb-e-hasrat kī mirī ta.abīr aadhī rah ga.ī

shiddat-e-lā-zavāl se chāhā
hasrat-e-be-panāh se dekhā

vahī hasrat vahī lab aur vahī mohar-e-sukūt
shauq ko jur.at-e-iz.hār kahāñ hai yaaro

un mahmaloñ pe aave majnūñ ko kyuuñ na hasrat
jin mahmaloñ ke andar do do svāriyāñ haiñ

agar dam bhar bhī miT jaatī ḳhalish ḳhār-e-tamannā kī
dil-e-hasrat-talab ko apnī hastī se gilā hotā

visāl-e-yār kī hasrat are ma.āz-allāh
firāq-o-shauq kī betābiyāñ are tauba

taḌap rahā huuñ yahāñ maiñ tanhā vahāñ adū se vo ham-baġhal haiñ
kisī ke dam par banī huī hai kisī kī hasrat nikal rahī hai

aa ke pahlū meñ mire baiTh maiñ ho jā.ūñ nisār
hai tamannā to yahī hai yahī hasrat merī