Tags-Hasrat

maiñ aa gayā kahāñ ki ye hasrat nazar ko hai
ai kaash is jagah koī apnā dikhā.ī de

aah hasrat karte haiñ insāñ gunah
hashr kī jaise sazā kuchh bhī nahīñ

kuchh aur dekhne kī hasrat rahī na baaqī
jab se sanam tumhārā chehra pasand aayā

dekhā to thā yahī sabab-e-hasrat-o-alam
majbūr ho ke tark kiyā mudda.ā ġharaz

vasl o firāq o hasrat o ummīd se khulā
hamrāh hai har ek baqā ke fanā ġharaz

tauba to kī hai magar ab bhī ye hasrat hai 'shamīm'
de ke qasmeñ mujhe ik baar pilā de koī

banā kāfir musalmāñ ab hai hasrat
maiñ kāfir ko musalmāñ kar gayā thā

kuchh ban paḌā na hasrat-e-tāmīr se to phir
ujḌe hue khañDar ko dar-o-bām likh diyā

maiñ charāġh-e-hasrat-e-nīm-shab meñ sharār-e-ātish-e-jāñ-ba-lab
dil-e-pur-umīd kī lau thā maiñ mujhe ḳhud vo aa ke bujhā gayā

ye hai kisī visāl kī hasrat ki ḳhauf-e-hijr
chubhtī hai rāt-bhar mujhe bistar kī koī chiiz

dil meñ vo aa ke hasrat-o-armāñ jagā ga.e
ummīd ke charāġh jalā kar bujhā ga.e

jalva dikhā ke guzrā vo nuur dīdgāñ kā
tārīk kar gayā ghar hasrat-e-kashīdgāñ kā

ab mire ghar se kahāñ chāñd dikhā.ī degā
maiñ ye hasrat liye tāroñ kī taraf dekhtā huuñ

Dūbtā huuñ to mujhe haath ka.ī milte haiñ
kitnī hasrat se kināroñ kī taraf dekhtā huuñ

ḳhabar nahīñ ki nigār-e-sahar kī hasrat meñ
tamām raat charāġh-e-vafā pe kyā guzrī

'sahbā' ye shahr-e-zīst sadāoñ kā shahr hai
ya.anī tanāb-e-hasrat-e-husn-e-bayān khīñch

tire muñh ko dekhūñ tire saath so.uuñ
ye hī hasrat-e-dil ye hī aarzū hai

dāġh-e-hasrat se dil ho mālāmāl
yahī daulat yahī ḳhazāna hai

tirā dīdār ho hasrat bahut hai
chalo ki niiñd bhī aane lagī hai