Tags-Hasrat

hasrat-e-āb-o-gil dobāra nahīñ
dekh duniyā nahīñ hamesha nahīñ

mohabbat meñ vafāoñ kā yahī in.aam hai 'sūfī'
liye dāġh-e-judā.ī hasrat-e-nākām hai 'sūfī'

jaane kis kī diid kī hasrat liye dil meñ 'shahāb'
dasht-o-sahrā se bhī aage sair kar aayā huuñ maiñ

vo jise paane kī hasrat dil meñ muddat se rahī
us ke hī ḳhātir use ab ġhair kar aayā huuñ maiñ

hasrat ko milā hai ḳhāna-e-dil
taqdīr khulī ġharīb ghar meñ

ab dil kī tamannā hai to ai kaash yahī ho
aañsū kī jagah aañkh se hasrat nikal aa.e

ai musavvir jo mirī tasvīr khīñch
hasrat-āgīñ ġham-zada dil-gīr khīñch

shauq o zauq ab bhī hai baaqī murda-dil ham haiñ to haiñ
apne dil ko hasrat-e-sair-e-gulistāñ ab bhī hai

kaafī hai tere haath kā chhallā yahī mujhe
kuchh ḳhātim-e-sulaimāñ kī hasrat nahīñ hai ab

shab ko mirī chashm-e-hasrat kā sab dard-e-dil un se kah jaanā
dāñtoñ meñ dabā kar hoñT apnā kuchh soch ke us kā rah jaanā

haif tumheñ fursat hī nahīñ hai varna kyā kyā hasrat thī
haal hamārā kuchh sun lete kuchh haal apnā sunāte tum

ḳhvāhish-e-dīd le ke aa.e the
hasrat-e-intizār le ke chale

yuuñ guzāre se guzar jā.eñge din apne bhī
par ye hasrat hī rahegī ki guzāre na ga.e

isī ko kāmyāb-e-dīd kahte haiñ nazar vaale
vo āshiq jo halāk-e-hasrat-e-dīdār ho jaa.e

milte haiñ roz un se hasrat kī sarhadoñ par
rahtā hai phir bhī haa.il kyuuñ jaane fāsla sā

ashk-e-hasrat hai aaj tūfāñ-ḳhez
kashtī-e-chashm kī tabāhī hai

dekh lete haiñ sabhī kuchh tire mushtāq-e-jamāl
ḳhair dīdār na ho hasrat-e-dīdār to hai

hasrat ke sadqe aañkh ke malte hī khul gayā
vo kuchh ki mumkināt se jis kā bayāñ na thā

dīdanī hai us kī hasrat us kā armāñ us kā shauq
jis kī kashtī Duub jaa.e aa ke sāhil ke qarīb

maiñ us maqām par huuñ jaise koī ḳhālī haath
nigāh-e-hasrat-o-armāñ liye dukān meñ hai