Tags-Hasrat

unheñ dekhegī tū ai chashm-e-hasrat vasl meñ yā maiñ
tire kaam aa.egā ronā ki mere kaam aa.egā

yuuñ ham ne chhupā.ī hai tire vasl kī hasrat
jis tarah chhupātā hai ḳhatā-vār ḳhatā ko

hasratoñ meñ ab ye ik hasrat hamāre dil meñ hai
itnā kah diije ki be-chāra baḌī mushkil meñ hai

hamārā ālam-e-hasrat bhī hai ajiib ki ham
guzar ga.e haiñ jo din un ke intizār meñ haiñ

masrūf is qadar the ki sāvan guzar gayā
hasrat rahī ki abr barastā dikhā.ī de

hasrat-e-ta.abīr se chhūTūñ kabhī
har nafas is ḳhvāb meñ jaltā sā maiñ

us kī hasrat dekhiye us kā kaleja dekhiye
raaz jis kī zindagī kā us ke mar jaane meñ hai

hamārā aañsū vo be-bahā hai nigāh-e-hasrat meñ jach rahā hai
mañgā ke ab us pe chaurahe meñ nisār karne guhar ko chaliye

o des se aane vaale batā
āḳhir meñ ye hasrat hai ki batā

maiñ hairat o hasrat kā maarā ḳhāmosh khaḌā huuñ sāhil par
dariyā-e-mohabbat kahtā hai aa kuchh bhī nahīñ pāyāb haiñ ham

hasrat hai tujhe sāmne baiThe kabhī dekhūñ
maiñ tujh se muḳhātib huuñ tirā haal bhī pūchhūñ

hasrat-e-āġhosh hai kyuuñ ham-kanār
ġhair se kab us ne kinārā kiyā

kahīñ aisā na ho mar jā.ūñ maiñ hasrat hī hasrat meñ
jo lenā ho to le lo sab se pahle imtihāñ merā

gulshan meñ havā se jo khulā yaar kā siina
hasrat se gayā phaT gul-o-gulzār kā siina

mujh ko yakjā.ī kī hasrat se bhalā kyā vāsta
maiñ to jī bhar kar sar-e-āfāq bikhrā bhī nahīñ

kafan kā gosha-e-dāman to ulTo
ye hasrat muñh lapeTe kyuuñ paḌī hai

bole vo hujūm-e-ġham-o-hasrat ko jo dekhā
kyuuñ is meñ raheñ ham ki hai kāshāna kisī kā

tire aate hī aate kaam āḳhir ho gayā merā
rahī hasrat ki dam merā na tere rū-ba-rū niklā

ham akele nahīñ rahte shab-e-tanhā.ī meñ
yās-o-andoh-o-ġham o hasrat-o-nākāmī hai

ham na but-ḳhāne meñ ne masjid-e-vīrāñ meñ rahe
hasrat-o-ārzū-e-jalva-e-jānāñ meñ rahe