Tags-Hasrat

aayā hai ik rāh-numā ke istiqbāl ko ik bachcha
peT hai ḳhālī aañkh meñ hasrat hāthoñ meñ gul-dasta hai

hai dil meñ josh-e-hasrat rukte nahīñ haiñ aañsū
ristī huī surāhī TuuTā huā subū huuñ

ziist meñ merī kamī thī ik ġham-e-jāñ-kāh kī
mil gayā qismat se vo bhī ab koī hasrat nahīñ

chubhtā māhaul ghuTī ruuh gurezāñ lamhe
dil kī hasrat hai kabhī un se nikal kar dekhe

kuchh qafas kī tīliyoñ se chhan rahā hai nuur sā
kuchh fazā kuchh hasrat-e-parvāz kī bāteñ karo

āñkhoñ meñ sulagtī huī vahshat ke jilau meñ
vo hairat o hasrat kā jahāñ yaad rahegā

rahī hasrat ye saarī umr 'bahrām'
na mujh ko yaar ne hargiz likhā ḳhat

kahāñ tak vaqt ke dariyā ko ham Thahrā huā dekheñ
ye hasrat hai ki in ā.ankhoñ se kuchh hotā huā dekheñ

jahāñ merī har ik hasrat haqīqat meñ badal jaa.e
ḳhabar kyā thī mire ḳhvāboñ kā vo sāhil kidhar hogā

karūñ kyā hasrat-e-gul ko vagarna
dil par daaġh bhī apnā chaman hai

hasrat-e-dil dekh āñkhoñ meñ na baiTh
is qadar be-pardagī achchhī nahīñ

phir ga.e nāvak bhī un ke dekh kar
mere dil meñ hasrat-e-dil kā nafāz

hasrat hai ye mareñ bhī jo qaid-e-qafas meñ ham
sayyād pheñk de hameñ gulzār kī taraf

gul-e-maqsūd meñ avval to mahak thī hī nahīñ
aur jo thī bhī vo hasrat kī havā ne le lī

hasrat pe us musāfir-e-be-kas kī roiye
jo thak gayā ho baiTh ke manzil ke sāmne

hasrat bharī nazroñ se use dekh rahā huuñ
vo aab jo chalte hue ḳhanjar se uḌī hai

hasrat ko bhī hasrat aatī hai ibrat ko bhī ibrat aatī hai
vo shakl hamārī ġham meñ huī ye haal hamārā ġham ne kiyā

koī ābād manzil ham jo vīrāñ dekh lete haiñ
ba-hasrat sū-e-charḳh-e-fitna-sāmāñ dekh lete haiñ

judā kareñge na ham dil se hasrat-e-dil ko
aziiz kyuuñ na rakheñ zindagī ke hāsil ko