Tags-Hasrat

na armāñ le ke aayā huuñ na hasrat le ke aayā huuñ
dil-e-betāb meñ terī mohabbat le ke aayā huuñ

uThāo miinā ki shām-e-ġham ko sahar ke anvār se badal deñ
ye dāġh-e-hasrat to be-takalluf jalā kareñge jalā kiye haiñ

jo terī diid ne baḳhshe vahī haiñ zaḳhm bahut
ab apne dil meñ koī hasrat-e-nazāra nahīñ

ham ne dekhe haiñ kuchh aise bhī asīrān-e-chaman
jin kī saarī umr guzrī hasrat-e-parvāz meñ

kū ḳhanda kū tabassum o kū fursat-e-suḳhan
is anjuman meñ haiñ lab-e-hasrat-gazīda huuñ

kū-e-butāñ se tauf-e-haram ko chale to ham
lekin kamāl-e-hasrat o hirmān o ġham ke saath

ḳhātma hijr kī shab kaun karegā merā
hasrat-e-vasl kā bigḌā huā anjām ki tū

koī talab na hasrat kuchh shauq hai na aadat
ab terī yaad merī lāchārī ho ga.ī hai

nasīm-e-sub.h ye kahtī hai kitnī hasrat se
koī to baaġh meñ mil jaa.e bāġhbāñ kī tarah

mar chukī hai ye vasl kī hasrat
terī yādoñ se dil lagānā hai

fikr-e-anjām-o-hasrat-e-āġhāz
do-ghaḌī chain se basar na huī

miTā Daalā mujhe phir bhī ye hai bedād kī hasrat
abhī fehrist-e-maujūdāt meñ shāmil samajhte haiñ

kal to tire ḳhvāboñ ne mujh par yuuñ arzānī kī
saarī hasrat nikal ga.ī mirī tan-āsānī kī

us aañkh ne jis kī qismat meñ sach-much ke dar-o-dīvār na the
ḳhvāboñ ke nagar ābād kiye hasrat kī nazar karne ke liye

sirf rasta hī nahīñ dekh ke ḳhush hotā thā
dar-o-dīvār bhī hasrat se milā karte the

thakan uThne nahīñ detī kisī nākām hasrat kī
savere ḳhvāb hī tere mujhe bedār karte haiñ

ye hasrat hai sajā luuñ apne hoñToñ par hañsī meñ bhī
ghaḌī bhar ko mire dil se agar ehsās-e-ġham nikle

hasrat se dekhte rahe har ḳhush-ḳhirām ko
ham sūrt-e-tuyyur tah-e-dām umr-bhar

huā huuñ ishq kī ġhārat-garī se sharminda
sivā.e hasrat-e-tāmīr ghar meñ ḳhaak nahīñ