Tags-Hasrat

jaate jaate kaf-e-afsos isī hasrat meñ
ashk bhar lā ke dam-e-naz.a bhī mal jā.ūñgā

yās-o-hasrat bharī be-amāñ zindagī
aas ke reshmī āñchaloñ meñ ga.ī

aisī tanhā.ī kā aalam hai ki har shaḳhs ke paas
ik pazīrā.ī kī hasrat meñ Thahartā jā.ūñ

na pūchho 'shād' vīrānī ko dil kī kyā batā.ūñ maiñ
tamannā jā chukī hasrat ġharīb is meñ akelī hai

tere jaane se mujh par ye uqda khulā rañg-o-ḳhushbū to bas terī mīrās the
ek hasrat sajī rah ga.ī gul-ba-gul ek mātam chaman-dar-chaman rah gayā

kab kahā maiñ ne ki vo mil jaa.e mujh ko maiñ use
ġhair nā ho jaa.e vo bas itnī hasrat hai to hai

shāyad niyāz-mand ko hāsil niyāz ho
hasrat se tak rahā huuñ tirī rahguzar ko maiñ

aañkh kī tasvīr sar-nāme pe khīñchī hai ki tā
tujh pe khul jaave ki is ko hasrat-e-dīdār hai

aatā hai dāġh-e-hasrat-e-dil kā shumār yaad
mujh se mire gunah kā hisāb ai ḳhudā na maañg

ba-qadr-e-hasrat-e-dil zulm bhī Dhānā nahīñ aatā
vo kyā taskīn deñge jin ko taḌpānā nahīñ aatā

hamd o tasbīh o sanā aur munājāt o duā karte haiñ
sirf ik diid kī hasrat meñ jiyā karte haiñ

muñh chhupā.e hue hāthoñ se guzar jaatā hai
hasrat-e-dīd dar-o-bām se sar phoḌtī rah jaatī hai

jis tarah hasrat-e-dīdār meñ ik umr guzārī hī nahīñ
aartī jaise kabhī us kī nigāhoñ ne utārī hī nahīñ

qissa-e-hasrat-e-dil ham se bayāñ kyā hogā
be-ruḳhī un kī hai aisī ki batā.e na bane

tire ḳhanjar ko bhī terī tarah hasrat se takte haiñ
tirī nāzuk kamar nāzuk kalā.ī dekhne vaale

kyā kabk ko dikhlāte ho andāz-e-ḳhirām aah
hasrat-zada-e-shoḳhi-e-raftār to ham haiñ

ġhanīmat hai ki ham ne chashm-e-hasrat paal rakkhī hai
zamāne ko ye hasrat bhī mire bhaa.ī nahīñ miltī

hasrat-e-lutf-e-azīzān-e-chaman jī meñ rahī
sar pe dekhā na gul-o-sarva kā saaya ham ne

sañg-e-dar ban kar bhī kyā hasrat mire dil meñ nahīñ
tere qadmoñ meñ huuñ lekin terī mahfil meñ nahīñ

dekh kar vo bāñkpan vo husn vo rañgīñ shabāb
dil kī hasrat ne bhī āḳhir lī vo añgḌā.ī ki bas