Tags-Hausla

koī shikva koī gila de de
mujh ko jiine kā hausla de de

maiñ ne bhī batāyā ki mirā hausla kyā hai
tevar to bahut tez the tūfān-e-balā ke

thak ke baiThā thā ki manzil nazar aa.ī mujh ko
hausla dene lagī ābla-pā.ī mujh ko

mere murġh-e-dil kī betābī uḌaa.ī kis tarah
hausla aisā nahīñ hai tā.ir-e-sīmāb kā

aziyyat raat khāne meñ parosī muflisī ke saath
'hiyā' kā hausla phir saath meñ khānā zarūrī thā

zabt-e-fuġhāñ go ki asar thā kiyā
hausla kyā kyā na kiyā kyā kiyā

kahūñ kyā ki dasht-e-hayāt meñ rahā silsila vo sarāb kā
kabhī hausla hī na kar sakī mirī aañkh dariyā ke ḳhvāb kā

ho gayā tark-e-talab kā naam ijz-e-hausla
jis se ham Darte rahe vo ittihām aa hī gayā

hausla detā huā sā mujh ko merā e'timād
be-yaqīnī dil meñ paidā Dar pe Dar kartī huī

jaur se ghabrāne vaale ham nahīñ haiñ dekhiye
hausla kab tak javāñ rahtā hai charḳh-e-pīr kā

qāmat-e-jānāñ se kartā hai akaḌ kar ham-sarī
hausla dekhe to koī sarv-e-be-buniyād kā

vahāñ pahuñch ke har ik naqsh-e-ġham parāyā thā
vo rāsta ki jahāñ hausla bhī haarā thā

mere a.asāb de rahe haiñ javāb
hausla kab niDhāl hai merā

ga.ī rut lauT bhī aatī hai 'ziyā' hausla rakh
ham ne dekhī haiñ siyah shāḳhoñ pe kaliyāñ baabā

manzileñ laakh kaThin aa.eñ guzar jā.ūñgā
hausla haar ke baiThūñgā to mar jā.ūñgā

kab lazzatoñ ne zehn kā pīchhā nahīñ kiyā
ye merā hausla thā ki lab vā nahīñ kiyā

subuk-sarī meñ bhī andesha-e-havā rakhnā
sulag uThe ho to jalne kā hausla rakhnā

agarche maiñ ik chaTān sā aadmī rahā huuñ
magar tire ba.ad hausla hai ki jī rahā huuñ

jo duā māñgī hai auroñ hī kī ḳhātir māñgī
hausla aaj mire dast-e-duā kā niklā