Tags-Hausla

ābādiyoñ se ga.e ho.uuñ ko
sahrāoñ ne hausla diyā hai

hausla kho na diyā terī nahīñ se ham ne
kitnī shiknoñ ko chunā terī jabīñ se ham ne

himmat-e-iltijā nahīñ baaqī
zabt kā hausla nahīñ baaqī

talab kā hausla hotā to ik din
ḳhitāb us but se bebākāna na karte

manzil baġhair tai kiye letā nahīñ huuñ chain
ye dam ye hausla hī kahāñ rāhbar meñ hai

asrār haqīqat kā ho ash.ār meñ shāreh
kyā hausla hai 'nāzim'-e-āshufta-navā kā

koī hausla hai na mudda.ā koī aarzū hai na iltijā
mire dil meñ ik tirī yaad hai mire lab pe ik tirā naam hai

javānī kī umañgeñ shauq-e-ilmī zehn-o-tabbā.ī
zakāvat hausla hilm-o-muravvat rahm-o-ġham-ḳhvārī

chhin ga.iiñ haath uThāne se duā.eñ mahñgī
hausla phir vo duāoñ kā bhalā kyā karte

kitnā be-mudda.ā hausla
dekhte dekhte miT gayā

hijr ko hausla aur vasl ko fursat darkār
ik mohabbat ke liye ek javānī kam hai

shahr-e-anā meñ aa.ine ke rū-ba-rū huuñ maiñ
ehsās kī nazar se mirā hausla bhī dekh

hausla rakkho safar kā ham-raho
mat ye socho kyā luTā kyā rah gayā

vo ibtidā-e-safar ab bhī yaad aatī hai
kisī meñ merī rifāqat kā hausla bhī na thā

hausla thā yā karam ho ki vafādārī ho
ham ne ulfat meñ ka.ī ḳhvāb suhāne dekhe

ġham uThāne kā hausla bhī nahīñ
aur is ke binā maza bhī nahīñ

ye aur baat ki kam-hausla to maiñ bhī thī
magar ye sach hai use pahle maiñ ne chāhā thā

vo sar karte haiñ jin ko hausla hai
vagarna zindagī ik marhala hai

phone par baat ḳhuub kar lī hai
ab to milne kā hausla kiije

ye haath apnā mire haath meñ thamā diije
thakā huā huuñ zarā dil ko hausla diije