Tags-Hausla

tum ne jiine kā mujhe hausla baḳhshā hai to phir
mujh se rahte ho gurezāñ ye siyāsat kaisī

hazār rañj ho dil laakh dard-mañd rahe
ḳhayāl past na ho hausla buland rahe

sāzisheñ alāmat to past himmatī kī haiñ
sāzisheñ jo karte haiñ hausla nahīñ rakhte

be-ijāzat uTh ke siina se lagā.e aap ko
hausla itnā bhī ik armān vaale dil kā hai

vafā ke barābar jafā chāhtā huuñ
tirā hausla dekhnā chāhtā huuñ

har ek baat ko chup-chāp kyuuñ sunā jaa.e
kabhī to hausla kar ke nahīñ kahā jaa.e

ye kyā ki hausla tum ne abhī se haar diyā
abhī to vaqt ne kuchh aur gul khilāne haiñ

apne hī fan kī aag meñ jalte rahe 'shamīm'
hoñToñ pe sab ke hausla-afzā.ī rah ga.ī

maiñ āñdhiyoñ ke paas talāsh-e-sabā meñ huuñ
tum mujh se pūchhte ho mirā hausla hai kyā

mere murġh-e-dil kī betābī uḌaa.ī kis tarah
hausla aisā nahīñ hai tā.ir-e-sīmāb kā

libās badlī huī raunaqoñ ke achchhe the
magar ye dil ki rakhā hausla-qabā tū ne

rahī gurez kī tah-dāmanī se bargashta
mujhe diyā thā vo saudā-e-hausla tū ne

mujhe yaqīñ hai ye mere hote zamāna saarā tyaag deñge
maiñ apne yāroñ kā hausla huuñ mujhe duāoñ meñ yaad rakhnā

tamām umr kise kaun yaad rakhtā hai
ye jānte haiñ magar hausla baḌhāte haiñ

bahut hausla mujh ko maiñ ne diyā hai
maiñ rote hue jab akelā rahā huuñ

bahut nikleñge roz-e-hashr tere jaur ke ḳhvāhāñ
sitam kā hausla duniyā meñ sarf-e-imtihāñ kyuuñ ho

kisī ke ishq ne vo hausla diyā mujh ko
koī bhī ġham mire dil par kabhī garāñ na huā

kuchh baḌhānā thā mazāq-e-bandagī kā hausla
pher lī tū ne nazar sharmā ke sajda rah gayā

hausla dev se laḌne kā kisī meñ bhī nahīñ
chāhte sab haiñ parī aa ke jagā le jaa.e