Tags-Hawa

gum huā jaatā hai koī manziloñ kī gard meñ
zindagī bhar kī masāfat rā.egāñ hone ko hai

ye bhī huā ki dar na tirā kar sake talāsh
ye bhī huā ki ham tire dar se guzar ga.e

soch meñ haiñ kuchh paas nahīñ kis tarah adam tak pahuñcheñge
aa ke safar darpesh huā hai fikr hai be-asbābī kī

dil na huā pahle jo bismil loTne se kyā matlab thā
dhuum thī jab ḳhush-bāshiyoñ kī ab shohrat hai betābī kī

ġhunche ḳhajil haiñ zikr se us ke tañg dahan hai aisā us kā
naam huā unaqā-e-zamāna dhuum uḌī nāyābī kī

vo bad-gumāñ huā jo kahīñ sher meñ mire
zikr-e-butān-e-ḳhalḳh-o-naushād aa gayā

chiin meñ sunte haiñ shāyad ab ā.īna ījād huā
varna ik tālāb hī apnī ārā.ish kā darpan thā

havā se baada nichoḌeñ kalī ko jaam kareñ
sukūt-e-rañg-e-chaman se zarā kalām kareñ

kisī āseb-zada dil kī sadā hai kyā hai
ye mire saath samundar hai havā hai kyā hai

sāqī-e-bazm tirī mast-nigāhoñ kā asar
dil pe kis vaqt huā thā ye mujhe hosh nahīñ

tū huā jalva-gar mubārak ho
rezish-e-sajda-e-jabīn-e-niyāz

mujh ko pūchhā to kuchh ġhazab na huā
maiñ ġharīb aur tū ġharīb-navāz

'asad'-ullāh ḳhaañ tamām huā
ai dareġhā vo rind-e-shāhid-bāz

havā ke vāste ik kaam chhoḌ aayā huuñ
diyā jalā ke sar-e-shām chhoḌ aayā huuñ

nahīñ hai agar un meñ bārish havā
uThā bādaloñ kī numā.ish havā

gahe barf hai gaah ātish havā
tujhe kyuuñ hai dillī se ranjish havā

maiñ gunjān shahroñ kā maarā huā
navāzish navāzish navāzish havā

tire saath chalne kī aadat nahīñ
hamārī na kar āzmā.ish havā

shikasta safīna musāfir niDhāl
talātum shab-e-tār bārish havā

ab ashk o tapish chashm o dil meñ nahīñ
the yakjā kabhī aab o ātish havā