Tags-Hawa

ek gulshan hai rutoñ ke aane jaane kā asiir
ek gulshan sab rutoñ meñ zehn mahkātā huā

mirī ġhairat-e-hama-gīr ne mujhe tere dar se uThā diyā
kuchh anā kā zor jo kam huā to ḳhabar huī tū ḳhudā sā hai

abhī lā kī manzil-e-saḳht meñ huuñ fareb-o-vahm-o-gumāñ liye
mire dil meñ phir bhī basā huā tirā naam radd-e-balā sā hai

vo zard chehra mo.attar nigāh jaisā thā
havā kā ruup thā bolo to aah jaisā thā

galī ke moḌ pe Thahrā huā thā ik saaya
libās chup kā badan par nibāh jaisā thā

ye jhāñk letī hai andar se ārzū-ḳhāna
havā kā qad mirī dīvār se ziyāda hai

maiñ nūr-e-sadāqat se parhez karūñ har dam
siine meñ siyāhī kā bahtā huā dariyā de

rakh diyā maiñ ne dar-e-husn pe haarā huā ishq
aaj ke ba.ad mirī jaan tumhārā huā ishq

choT gahrī thī magar paañv nahīñ ruk paa.e
ham palaT aa.e vahīñ ham ko dobāra huā ishq

jhilmilātā hai mirī aañkh meñ aañsū ban kar
aa gayā raas mujhe dil meñ utārā huā ishq

sikka-e-vaqt badalte hī sabhī chhoḌ ga.e
zaat ke shahr meñ ik umr sahārā huā ishq

jab bhī hotī hai dar-e-ḳhvāb pe dastak koī
jaag jaatā hai tire hijr kā maarā huā ishq

merī palkoñ se Tapaktā hai lahū ban ke 'amīn'
terī galiyoñ meñ shab-o-roz guzāra huā ishq

maiñ kaun huuñ kahāñ se huuñ aur kis kā pyaar huuñ
bhūlā huā thā mujh ko batānā paḌā use

ham ḳhaak ho ke bhī har mauj-e-havā se uljhe
ya.anī tirī vafā kā saudā gayā na sar se

phailā huā hai husn-e-āriz-e-raushan naqāb meñ
kyā kyā taḌap rahī hai tajallī hijāb meñ

kyā huā ye ki ḳhuuñ meñ Duubī huī
lapTeñ aatī haiñ lāla-zāroñ se

anjām-e-ishq maanā aksar burā huā hai
be-ishq zindagī kā anjām kyā huā hai

kyā hāl-e-dil sunā.eñ kyā vaj.h-e-ġham batā.eñ
bas ye ki āj-kal vo ham se khichā huā hai

kyā zikr gul-ruḳhoñ kā is shahr ke kareñ ham
har shaḳhs hī yahāñ to qātil banā huā hai