Tags-Hawa

jītne mārka-e-dil vo lagātār gayā
jis ghaḌī fat.h kā ailān huā haar gayā

chaak par chaak huā juuñ juuñ sulāyā ham ne
is garebāñ hī se ab haath uThāyā ham ne

ye sitam taaza huā aur ki pā.īz meñ 'mīr'
dil ḳhas-o-ḳhār se nā-chār lagāyā ham ne

jab se us ne shahr ko chhoḌā har rasta sunsān huā
apnā kyā hai saare shahr kā ik jaisā nuqsān huā

ye dil ye aaseb kī nagrī maskan sochūñ vahmoñ kā
soch rahā huuñ is nagrī meñ tū kab se mehmān huā

sahrā kī muñh-zor havā.eñ auroñ se mansūb huiiñ
muft meñ ham āvāra Thahre muft meñ ghar vīrān huā

mere haal pe hairat kaisī dard ke tanhā mausam meñ
patthar bhī ro paḌte haiñ insān to phir insān huā

itnī der meñ ujḌe dil par kitne mahshar biit ga.e
jitnī der meñ tujh ko pā kar khone kā imkān huā

kal tak jis ke gird thā raqsāñ ik amboh sitāroñ kā
aaj usī ko tanhā pā kar maiñ to bahut hairān huā

us ke zaḳhm chhupā kar rakhiye ḳhud us shaḳhs kī nazroñ se
us se kaisā shikva kiije vo to abhī nādān huā

jin ashkoñ kī phīkī lau ko ham be-kār samajhte the
un ashkoñ se kitnā raushan ik tārīk makān huā

yuuñ bhī kam-āmez thā 'mohsin' vo is shahr ke logoñ meñ
lekin mere sāmne aa kar aur bhī kuchh anjān huā

ab na jaane kis taraf le jaa.eñ vahshī āñdhiyāñ
shāḳh se TuuTā huā pattā bahut dil-gīr hai

vo jalva tuur par jo dikhāyā na jā sakā
āḳhir yahī huā ki chhupāyā na jā sakā

be-ashk kyā huā ki maiñ be-aks ho gayā
ā.īna thā ye paanī utarne se peshtar

ye tai huā thā ki ḳhuub ro.eñge jab mileñge
ab us ke shāne pe sar hai to hañste jā rahe haiñ

yaad ab us kī aa na sakegī soch ke ye baiThe the ki bas
khul ga.e dil ke saare darīche thā jo havā kā zor bahut

kis se kis kā sāthī chhūTā kis kā 'umar' kyā haal huā
parbat parbat vaadī vaadī raat machā thā shor bahut

taras ga.e the mire lab hañsī ko jis ke sabab
huā hai aaj vahī ashk-bār mere liye

ham jis ke ho ga.e vo hamārā na ho sakā
yuuñ bhī huā hisāb barābar kabhī kabhī