Tags-Haya

ho ga.ī fart-e-nazākat se hayā kī shohrat
aa gayā un ko pasīna jo laḌī merī aañkh

ġhair ko yā rab vo kyūñkar mana-e-gustāḳhī kare
gar hayā bhī us ko aatī hai to sharmā jaa.e hai

khul jaane meñ vo kaif aur vo dilkashī kahāñ
hai jab kisī kī sharm-o-hayā-o-hijāb meñ

jab mile do dil muḳhil phir kaun hai
baiTh jaao ḳhud hayā uTh jā.egī

aalam ke dostoñ meñ muravvat nahīñ rahī
sharm-o-hayā-o-mehr va shafqat nahīñ rahī

phir dil se 'fānī' saare ke saare naqsh-e-jafā miT jaate haiñ
jis vaqt vo zālim sāmne aa kar jān-e-hayā ho jaatā hai

ḳhajil hai āñkhoñ se nargis gulāb gāloñ se
vo kaun phuul hai jis ko hayā nahīñ aa.ī

hai paas ye kis kī nigah-e-mahv-e-hayā kā
lab tak jo mire harf-e-tamannā nahīñ aatā

narm hoñge tere jalve bhī tirī guftār bhī
bā-hayā hogī tirī pāzeb kī jhankār bhī

jis jagah hūrān-e-jannat kā kiyā hai tazkira
kyā kahā hai aur bhī kuchh ham ne juz husn o hayā

kabhī tum dhuul uḌāte ho mirī ġhusse siiñ rūkhe ho
kabhī muñh par hayā kā lā araq chhiḌkāv karte ho

us kī ma.asūm tabī.at kī hayā ne rokā
varna maiñ us ko baḌe ḳhvāb dikhā saktā thā

biite dinoñ kī koī nishānī to saath ho
jān-e-hayā tumheñ zarā sharmānā chāhiye

kāñch kī zanjīr TuuTī to sadā bhī aa.egī
aur bhare bāzār meñ tujh ko hayā bhī aa.egī

masjid ko diyā chhoḌ riyā kī ḳhātir
ka.abe nahīñ jaatā to hayā kī ḳhātir

jabīñ pe dhuup sī āñkhoñ meñ kuchh hayā sī hai
tū ajnabī hai magar shakl āshnā sī hai

ādāb-e-chaman anjām to de gul se na haTā titlī ko sabā
ulfat kī hayā mahfūz rahe go tujh meñ hoñ tūfāñ aur sahī

us be-hayā se kaahe ko ḳhālī karo ho maġhz
ye bevaqūf hai jo kahe aan ye suḳhan

hayā se nahīñ pusht-e-pā par vo chashm
mirā haal madd-e-nazar kuchh nahīñ