Tags-Haya

vo to kahte haiñ ki uTh jaa.eñ mere kūcha se aap
haa.e kitnī ho ga.ī haiñ be-hayā baiThe haiñ ham

chaman ujāḌne vaalo tumheñ ḳhudā samjhe
tumheñ na aa.ī hayā phuul to hamāre ga.e

paanī se sag-gazīda Dare jis tarah 'asad'
Dartā huuñ aa.ine se ki mardum-gazīda huuñ

pās-e-adab mujhe unheñ sharm-o-hayā na ho
nazzāra-gāh meñ asar-e-mā-sivā na ho

na mohabbat hai diloñ meñ na hayā āñkhoñ meñ
ye sanam tū ne banā.e haiñ ḳhudāyā kaise

vo sādgī na kare kuchh bhī to adā hī lage
vo bhol-pan hai ki bebākī bhī hayā hī lage

janāze par bhī vo aate to muñh ko Dhāñk kar aate
hamārī jaan le kar bhī na andāz-e-hayā jaatā

vo apnī aañkh kī uryāniyat chhupāne ko
hayā kī aañkh pe chādar pahan ke niklā hai

ye kab tak pārsā.ī āshiqoñ se
mohabbat hai to phir ham se hayā kyā

saḳht-jān o be-hayā do chaar ham se jo rahe
har ghaḌī pāband-e-ḳhauf-e-izzat-o-jāñ hoñ to kyā

surma.ī shaam ke chehre pe hayā kā āñchal
achchhā lagtā hai bahut aisā nazāra mujh ko

muñh chhupātā hai tū ā.īne se
kis qadar sharm-o-hayā tujh meñ hai

juz mohabbat kise ma.alūm ki vo chashm-e-hayā
baat to kartī hai andāz judā hai sab se

chhalak rahā hai qabā-e-hayā se us kā shabāb
sharāb jur.at-e-mai-ḳhvār kī talāsh meñ hai

kabhī hayā unheñ aa.ī kabhī ġhurūr aayā
hamāre kaam meñ sau sau tarah futūr aayā

sharmā ke yuuñ na dekh adā ke maqām se
ab baat baḌh chukī hai hayā ke maqām se

varna parda uThā deñ duniyā kā
sirf apnī hayā se Darte haiñ

ka.ī roz meñ aaj vo mehr-liqā huā mere jo sāmne jalva-numā
mujhe sabr o qarār zarā na rahā use pās-e-hijāb-o-hayā na rahā

zamāne kā ye haal aur dil kā ye haal
kaho kis tarah rahtī sharam aur hayā hai

baat vo saaf hī kab thī jo samajh meñ aatī
mujh se kuchh kahtī rahī chashm-e-hayā āhista