Tags-Haya

un ras bharī āñkhoñ meñ hayā khel rahī hai
do zahr ke pyāloñ meñ qazā khel rahī hai

ye kyā sitam hai vasl meñ muñh par naqāb hai
qurbān is hayā ke ye kaisā hijāb hai

sar-e-mahfil adū se vasl kā iqrār karnā thā
tumheñ kuchh bhī hayā aa.ī tumheñ kuchh bhī hijāb aayā

haa.il hai hijāb-e-sharm-o-hayā dīdār to kyā guftār to kyā
mub.ham haiñ ishāre sab us ke inkār to kyā iqrār to kyā

hasrat-e-ahd-e-vafā baaqī hai
terī āñkhoñ meñ hayā baaqī hai

maiñ huā ba-ḳhāk-e-siyah-faro tire kūche meñ ba-sad-ārzū
rahā sharmgīñ hī hamesha tū tirī ab talak na hayā ga.ī

marhabā jashn-e-jibillat ki nahīñ ham pāband
marhabā ziist ki āzād-e-hayā hai yaksar

aap lahrā ke na yuuñ dūdhiyā āñchal ko chaleñ
muskurāte hue phūloñ ko hayā aatī hai

lage haiñ baḌhne nazar nazar meñ fahāshiyoñ ke tamām sapne
saroñ pe sāya-fagan thī kal tak ridā hayā kī simaT rahī hai

chehre pe chamak āñkhoñ meñ hayā lab garm ḳhunuk chhab narm navā
jinheñ itne sukūn meñ dekhā thā vahī aaj mile ghabrā.e hue

udhar har ek nazar meñ hai hasratoñ kā julūs
idhar ye hukm-e-hayā hai nigāheñ chaar na kar

kabhī hañs ke muñh ko chhupā liyā kabhī muskurā ke dikhā diyā
kabhī shoḳhiyāñ thiiñ kabhī hayā tumheñ yaad ho ki na yaad ho

jo banā hai ārif-e-bā-ḳhudā ye vahī 'zahīr' hai be-hayā
vo jo rind-e-ḳhāna-badosh thā tumheñ yaad ho ki na yaad ho

insāñ to pheñk deñge libās-e-hayā ko duur
un kā har ik gunāh chhupātī rahegī shaam

vaqt-be-vaqt kyuuñ baraste haiñ
bādaloñ meñ hayā nahīñ baaqī

aarsī hotī hai sanmukh tere
kuchh bhī āñkhoñ meñ hayā rakhtī hai

kahtī hai hayā fariyād na kar
ai ishq hameñ barbād na kar

us jān-e-hayā kā bas nahīñ kuchh be-bas hai parā.e bas meñ hai
be-dard diloñ ko kyā hai ḳhabar jo pyaar yahāñ aapas meñ hai

kyuuñ na saafī us kuuñ hāsil ho jo misl-e-ārsī
apne jauhar kī hayā suuñ sar-ba-sar paanī huā

ḳhalvat meñ kyuuñ ye saath haiñ sab ko alag karo
shoḳhī kā hai na kaam na hājat hayā kī hai