Tags-Haya

dekh kar haal mirā un se hañsī ruk na sakī
rokne ke liye har chand hayā bhī aa.ī

uf vo māsūm o hayā-rez nigāheñ jin par
qatl ke baad bhī ilzām nahīñ aatā hai

hai jā-e-husn hayā aur bhī izāfa kar
nazar ke sāmne aa jā nazar jhukā.e hue

ik shoḳh se sairāb nazar hone lagī hai
qābiz hai magar dil pe hayā aur kisī kī

shab ko jab abrū-o-mizhgāñ kī saf-ārā.ī huī
shoḳhiyoñ meñ dab ga.ī sharm-o-hayā aa.ī huī

vasl meñ achchhī tarah jab bāda-paimā.ī huī
uḌ ga.ī kāfūr ban ban kar hayā aa.ī huī

aañkh us kī nahīñ ā.īne ke sāmne hotī
hairat-zada huuñ yaar kī maiñ sharm-o-hayā kā

shoḳh kahtā hai be-hayā jaanā
dekho dushman ne tum ko kyā jaanā

utrā thā jis pe bāb-e-hayā kā varaq varaq
bistar ke ek ek shikan kī sharīk thī

ġhair ko yā rab vo kyūñkar mana-e-gustāḳhī kare
gar hayā bhī us ko aatī hai to sharmā jaa.e hai

kyuuñ na ulTī naqāb chehre se
hashr kī kyuuñ huī hayā maan.e

bhar diiñ shabāb ne ye un āñkhoñ meñ shoḳhiyāñ
til bhar bhī ab jagah nahīñ un meñ hayā kī hai

sharm-o-hayā sab qisse haiñ
sūkhā aañkh kā paanī hai

is daur meñ ga.ī hai muravvat kī aañkh phuuT
mādūm hai jahān se chashm-e-hayā-parast

milā na lutf-e-visāl lekin maze kā shab bhar rahā tamāshā
idhar khulā band us qabā kā girah lagā dī udhar hayā ne

vo rañg-e-hayā ehsās-e-tarab ā.īna-e-ruḳh ke aks-fagan
ik tābish tere chehre kī ik aañch sī mere siine meñ

kuchh to hai zikr se dushman ke jo sharmāte haiñ
vahm meñ Daal diyā un kī hayā ne ham ko

shā.istagī mohabbateñ ulfat vafā hayā
rakkhī hai mere paas tirī sab nishāniyāñ

mujh se katrā ke nikal jā magar ai jān-e-hayā
dil kī lau dekh rahā huuñ tire ruḳhsāroñ meñ

hayā aisī adab itnā hamārī aql hairāñ hai
are tum mard ho kar us se parda kaise karte ho