Tags-Haya

kahīñ ek ma.asūm nāzuk sī laḌkī mare zikr par jheñp jaatī to hogī
hayā-bār āñkhoñ meñ sapne sajā.e vo kuchh soch kar muskurātī to hogī

ḳhvāb lab ḳhvāb jabīñ ḳhvāb adā ḳhvāb hayā
itne ḳhvāboñ meñ koī ḳhvāb to sachchā hogā

dil lene ke andāz kā kuchh naam nahīñ hai
mauqūf hai ye chiiz adā par na hayā par

ḳhāna-ḳharāb-e-ishq ne kho ke mirī hayā-o-sharm
mujh ko kiyā zalīl aah ḳhāna-ba-ḳhāna kū-ba-kū

shoḳhiyāñ kahtī haiñ khul kheleñge vo
ab hayā kī pāsbānī jā.egī

barham haiñ vo ġhair be-hayā se
māñgeñ kuchh aur bhī ḳhudā se

bahār aa.ī hai mastāna ghaTā kuchh aur kahtī hai
magar un shoḳh nazroñ kī hayā kuchh aur kahtī hai

nazar jhuk rahī hai ḳhamoshī hai lab par
hayā hai adā hai ki an-ban hai kyā hai

hayā ne baḌh ke pukārā ye ''kāhisheñ be-kār''
nazar ne jhuk ke sadā dī ye ''kāvisheñ be-sūd''

shoḳhī meñ sharārat meñ matānat meñ hayā meñ
jo raaz kā aalam thā vahī raaz kā aalam

uljhe hue jumloñ meñ sharārat bhī hayā bhī
jazbāt meñ Duubā huā āvāz kā aalam

tābūt hī dekhā na mirā aañkh uThā kar
kyā sharm hai kushta huuñ maiñ us sharm o hayā kā

sarshār nigāhoñ meñ hayā jhuum rahī hai
haiñ raqs meñ aflāk zamīñ ghuum rahī hai

vahī jo hayā thī nigār aate aate
batā tū hī ab hai vo pyaar aate aate

pāsbānān-e-hayā kyā hue ai daulat-e-husn
ham churā kar tirī duz-dīda nazar jaate haiñ

donoñ ne baḌhā.ī raunaq-e-husn
shoḳhī ne kabhī kabhī hayā ne

shafaq khil uThī champa.ī ārizoñ par
nikhārā tire rañg-e-ruḳh ko hayā ne

sharm tā-chand hayā bhī kab tak
muñh se burqe ko judā kījiye bas

mujh se tanhā.ī meñ gar miliye to diije gāliyāñ
aur bazm-e-ġhair meñ jān-e-hayā ho jā.iye

vo use kyā kyā kahe aur ye saraktā hī nahīñ
ho gayā yuuñ be-hayā dil haa.e dil afsos dil