Tags-Haya

apnī aadat se vo baaz aa jaa.eñ mumkin hī nahīñ
kahne-sunñe se ghaḌī-bhar ko hayā aa.ī to kyā

hayā ne go jur.at-e-takallum zabān se chhīn lī hai lekin
vo āñkhoñ āñkhoñ hī meñ bahut kuchh sunā chuke aur sunā rahe haiñ

yahī chāhe hai jī ki gale se lago zarā mere dahan se dahan to malo
nahīñ ġhurfe se aan ke jhāñk to lo tumheñ apnī hai sharm-o-hayā kī qasam

shurū-e-ishq meñ un se hī kuchh hijāb na thā
kabhī kabhī to ḳhud apne se bhī hayā aa.ī

yuuñ dabe paañv chalī bād-e-nasīm
jaise ādāb-e-hayā jāntī hai

sajda badal rakhe sar sar-tā-qadam araq ho
tujh bā-hayā ke pag par aa kar hinā hayā suuñ

itnā bhī na ho koī hayā-dār
dekhā to samā ga.e nazar meñ

un kī hayā o sharm ne rakkhī hai dil kī sharm
kyā hogā jab nigāh milegī nigāh se

kiyā huuñ tark nargis kā tamāshā
talab-gār-e-nigāh-e-bā-hayā huuñ

ġhash bhī aayā mirī pursish ko qazā bhī aa.ī
be-muravvat tujhe kuchh sharm o hayā bhī aa.ī

andāz meñ shoḳhī meñ sharārat meñ hayā meñ
vaañ ek na ik baat nikaltī hī rahegī

aaj kiye hazār qatl kal kiye aur bhī sivā
shaġhl ye jis nigah kā ho us ko hayā kī vaj.h kyā

ruḳhsār par hai rañg-e-hayā kā faroġh aaj
bose kā naam maiñ ne liyā vo nikhar ga.e

hayā kī ik hasīñ chādar agar taanī nahīñ hotī
tumhārī sub.h raushan raat nūrānī nahīñ hotī

kartā hai bas-ki baaġh meñ tū be-hijābiyāñ
aane lagī hai nik.hat-e-gul se hayā mujhe

chāñd ko jis se hayā aatī hai
jazb kyā us kī adā kī jaa.e

maiñ taḌap kar mar gayā dekhā na us ne jhāñk kar
us sitamgar ko aziiz apnī hayā thī maiñ na thā

diloñ ko sabr-o-sukūñ to na mil sakā lekin
koī to kaam tirī chashm-e-bā-hayā se huā

mujāvarān-e-havas tañg haiñ ki yuuñ kaise
baġhair sharm-o-hayā bhī hayā ke saath huuñ maiñ