Tags-Haya

ismat kā hai lihāz na parvā hayā kī hai
ye sin ġhazab kā hai ye javānī balā kī hai

muñh gaal pe rakh dete haiñ sote meñ chimaT kar
kuchh kuchh to hayā kam huī baare ka.ī din se

sharm-o-hayā kahāñ kī har baat par hai shamshīr
ab to bahut vo ham se bebāk ho gayā hai

zaḳhmoñ kā chāñd dil kī tapish aur hayā ke rañg
ab sab chale ga.e haiñ tirī anjuman ke saath

kahte hue saaqī se hayā aatī hai varna
hai yuuñ ki mujhe durd-e-tah-e-jām bahut hai

ye adā.eñ haiñ yaar ke fitne
hayā shoḳhī ġhazab kā itrānā

laḌā de āñkheñ vo be-hijābī ki phir palak se palak na maare
nazar jo nīchī kare to goyā khilā sarāpā chaman hayā kā

jis ne dil māñgā nahīñ chhīn liyā hai mujh se
aap meñ aa.uuñ to vo aañkh hayā sī likkhūñ

husn-e-aḳhlāq bhī hai husn-e-javānī kī tarah
jhuk ga.ī haiñ tirī āñkheñ jo hayā aa.ī hai

chhup chhup ke sadā jhāñktī haiñ ḳhalvat-e-gul meñ
mahtāb kī kirnoñ ko hayā tak nahīñ aatī

hayā ke rañg se gulzār ho gayā chehra
pata hai us ko ki maiñ pyaar karne vaalā huuñ

libās vāloñ se baḌh kar hayā hai āñkhoñ meñ
hamārī āñkhoñ meñ kuchh be-libās pāgal haiñ

do irādoñ meñ jo haa.il the hayā ke parde
kis ne sarkā.e ishārāt-e-nazar se pahle

bijlī chamke to bahāne se lipaT jaate haiñ
phir vo kahte haiñ baḌī sharm-o-hayā se tauba

kyā qahr hai ai 'bāsit' ye tab-e-hayā-parvar
un kī hī mohabbat hai un se hī chhupānā hai

bas tire rañg-e-hayā kī mānind
hū-ba-hū tere sarāpā kī tarah

unheñ pās-e-hayā Thahrā to apne paañv larzāñ haiñ
hamārī jur.atoñ kā un ke sharmāne kā vaqt aayā

mahram haiñ hamīñ garmī-e-guftār se un kī
jo hoñT jo āñkheñ haiñ girāñ-bār hayā se

mālūm nahīñ ham se hijāb un ko hai kaisā
auroñ se to vo sharm o hayā kuchh nahīñ karte

kahūñ kyā na dekheñ jo merī taraf
taġhāful sharīk-e-hayā ho gayā