Tags-Haya

ḳhudā kā shukr hai sharm-o-hayā salāmat hai
vo ā.īna hai magar maiñ bhī be-hijāb nahīñ

sharīk-e-sharm-o-hayā kuchh hai bad-gumānī-e-husn
nazar uThā ye jhijak sī nikal to saktī hai

har dam javāb saaf muravvat se hai ba.iid
vo baat tū na kar ki hayā ko burī lage

ehsās-e-alam aur pās-e-hayā us vaqt kā aañsū sahbā hai
us chashm-e-hasīñ ko kyā kahiye jab pī na sakī chhalkā hī ga.ī

ab tarīqa hai yahī muuñd leñ apnī āñkheñ
varna duniyā ko hayā bhī to nahīñ aatī hai

kyā salīqa hai sitamgārī kā
ruḳh pe dāmān-e-hayā rakhte haiñ

aaj qaus-e-quzah kā lutf kahāñ
apne aariz pe rañg hayā ke to dekh

ik martaba dil pe iztirābī aa.ī
ya.anī ki ajal merī shitābī aa.ī

baḌh chalī hai bahut hayā terī
mujh ko rusvā na kar ḳhudā ke liye

aaj hayā aañkh kī kuchh aur hai
chāhne vaalā koī paidā kiyā

jab phañsā zulf meñ jā dil na rahā nañg-o-hayā
taaq par rakhiye vahāñ nañg-o-sharam donoñ ek

sharāfat ab hayā īmān-dārī
kahāñ DhūñDhuñ kahāñ rakkhī huī hai

ruḳhsār hasīñ darpan āñkhoñ meñ hayā raushan
kirdār tirā sandal jazbāt tirī bāteñ

kabhī to chashm-e-falak meñ hayā dikhā.ī de
ki dhuup sar se haTe aur ghaTā dikhā.ī de

ye log vafā ke haamī the nā-mūs-o-hayā ke haamī the
bas ek rasūl ke qaa.il bas ek ḳhudā ke haamī the

mujh se tanhā.ī meñ gar miliye to diije gāliyāñ
aur bazm-e-ġhair meñ jān-e-hayā ho jā.iye

har-chand qayāmat hai tirī chashm kī shoḳhī
shoḳhī meñ magar rañg-e-hayā aur hī kuchh hai

gul-gasht meñ dāman muñh pe na lo nargis se hayā kyā hai tum ko
us aañkh se parda karte ho jis aañkh meñ pardā koī nahīñ

na.ash pe aa ke mirī us ne vo bāteñ chheḌīñ
har azādār ko ibrat bhī hayā bhī aa.ī

dekh kar haal mirā un se hañsī ruk na sakī
rokne ke liye har chand hayā bhī aa.ī