Tags-Haya

ġhairoñ pe lutf ham se alag haif hai agar
ye be-hijābiyāñ bhī hoñ uzr-e-hayā ke ba.ad

vaqt hai aisā thā ruḳhsat ho ga.ī un kī hayā
baat hī aisī thī khul khele vo sharmāne ke ba.ad

ai bāġh-e-hayā dil kī girah khol suḳhan bol
tañgī hai mire haal par ai ġhuncha-dahan bol

fikr-e-ifshā-e-rāz kyuuñ na karūñ
kyā hayā-ḳhez hai nazar dekho

be-qarāroñ se un ko sharm aa.ī
shoḳhiyāñ rah ga.iiñ hayā ho kar

itnī hayā kyuuñ ā.īne se
ye to mirī tasvīr nahīñ hai

bikharnā hai to fazā maiñ bikher de ḳhushbū
hayā nazar meñ qadam meñ vaqār baaqī rakh

lipaT bhī jā na ruk 'akbar' ġhazab kī beauty hai
nahīñ nahīñ pe na jā ye hayā kī duty hai

nīchī nazroñ se kar diyā ghāyal
ab ye samjhe ki ye hayā kyā hai

nazar un kī gosha-nashīñ hai hayā se
ishārā nahīñ ye ishārā nahīñ hai

gul hue ġharq āb-e-shabnam meñ
dekh us sāhib-e-hayā kī adā

garebāñ ke baTan sar kā dupaTTa aañkh kā parda
tumhārī artificial hayā meñ kuchh nahīñ rakkhā

kah apas chashm-e-bā-hayā kuuñ sanam
raf.a kar raf.a kar hijāb hijāb

hotā hai inqalāb jahāñ har adā ke ba.ad
bebāk bhī banoge kabhī tum hayā ke ba.ad

kyā sharm-e-ḳhudī kyā pās-e-hayā ġhurbat kī añdherī rātoñ meñ
kitne hī butān-e-zohra-jabīñ bā-dīda-e-nam bik jaate haiñ

baḌe bā-hayā aur parda-nashīñ ho
hai har kū-o-barzan meñ charchā tumhārā

shoḳhiyāñ sharm-o-hayā nuur ke saa.e jheleñ
umr meñ pahle-pahal dekheñ mukammal āñkheñ

vo ek ham ki jo chāhā kiyā visāl kī raat
vo ek tum ki tumhārī hayā se kuchh na huā

bichhaḌ kar aap se jiine kī ḳhvāhish kufr hai lekin
hamārī zindagī hī be-hayā hai kyā kiyā jaa.e

javānī ne diye haiñ un ko lā kar ham-nashīñ kyā kyā
adā meñ naaz chitvan meñ hayā āñkhoñ meñ mastī hai