Tags-Haya

tere chehre pe qayāmat hai hayā kī surḳhī
rañg-e-gul rañg-e-shafaq rañg-e-hinā kuchh bhī nahīñ

aañkh meñ thī hayā har mulāqāt par surḳh aariz hue vasl kī baat par
us ne sharmā ke mere savālāt pe aise gardan jhukā.ī mazā aa gayā

bajā sahī ye hayā aur ye ehtiyāt magar
kabhī kabhī to mohabbat meñ hausla kiyā kar

kyā khule baaġh meñ vo chashm-e-hijāb-ālūda
aañkh uThāte hue nargis ko hayā aatī hai

dil-o-nazar ko lihāz-o-hayā se kyā matlab
ye be-adab hai sarāsar vo sar-ba-sar gustāḳh

haiñ vasl meñ shoḳhī se pāband-e-hayā āñkheñ
allāh-re zālim kī mazlūm-numā āñkheñ

hamārī aañkh meñ sharm-o-hayā kā hai parda
nazar milā.e koī ye majāl thoḌī hai

baḌhtī huī betābī kuchh ruuTh ga.ī shāyad
jhaTke hue dāman se hāthoñ ko hayā aa.ī

aisā nahīñ ki chāñd na utrā ho baam par
maiñ hī tamām raat hayā meñ lagā rahā

hayā se sar jhukā lenā adā se muskurā denā
hasīnoñ ko bhī kitnā sahl hai bijlī girā denā

'ābid' bayān-e-jalva-nāgāh kyā karūñ
ḳhūbī adā ke saath hai shoḳhī hayā ke saath

javāñ hone lage jab vo to ham se kar liyā parda
hayā yak-laḳht aa.ī aur shabāb āhista āhista

ik mohabbat kī ye tasvīr hai do rañgoñ meñ
shauq sab merā hai aur saarī hayā us kī hai

ye hayā-ālūd shaam
khiḌkiyoñ se khiḌkiyoñ tak jhilmilātī jā rahī hai

aa.ī parī sī parda-e-mīnā se jaam tak
āñkhoñ meñ terī duḳhtar-e-raz kyā hayā na thī

ham ne hayā pahan ke mohabbat-shi.ār kī
guḌiyoñ ke vāste bhī ġharāre banā.e the

majbūr apnī sheva-e-sharm-o-hayā se tum
nā-chār iztirāb-e-dil-e-mubtalā se ham

nā-chār iḳhtiyār kiyā sheva-e-raqīb
kuchh be-hayā.ī ḳhuub haiñ guzre hayā se ham

pahle bhī be-libās the itne magar na the
ab jism se libās-e-hayā bhī utar gayā

hayā se nīchī nigāhoñ ko band rakhnā hai
nazar kabhī jo uThā leñ to jurm hai apnā