Tags-Haya

na kisī meñ husn-e-hayā rahā na kisī meñ bū-e-vafā rahī
abhī dosh-e-aql pe sar-basar koī dev-e-makr savār hai

jo bas chale to vo simTā le har numū-e-badan
hayā se apnī koī yuuñ thakā huā na milā

havā kī larzisheñ dahkātīñ āriz-o-lab ko
hayā kī mauj se saarā badan gulābī ho

kyā husn thā ki aañkh lagī saaya ho gayā
vo sādgī kī maar, hayā kam bahut hī kam

hijāb-o-hayā sochte rah ga.e haiñ
milī ishq meñ kāmyābī pahal se

jhukī nigah meñ hai Dhab pursish-e-nihānī kā
hayā meñ zor diyā rañg mehrbānī kā

shab-e-visāl kahāñ ḳhvāb-e-nāz kā mauqa.a
tumhārī niiñd ko aate hayā nahīñ aatī

hayā kā parda hai varna tum to hue pashemān-e-jañg-e-dushman
nahīñ ho fikr musālahat meñ to ham se mil kar hayā na karnā

haif dil meñ tire vafā na huī
kyuuñ tirī chashm meñ hayā na huī

gul aa ke zer-e-kafsh-e-sabā saaf ho gayā
juutī jo be-hayā ke paḌī ḳhaak jhaḌ ga.ī

hotī kahāñ tak mustarad be-bākī-e-dast-e-sabā
khulne lagā band-e-hayā āḳhir shagūfa hī to hai

sar-e-mahfil jo mujh ko dekhte haiñ vo kan-āñkhiyoñ se
chhupī baiThī hai shoḳhī un kī āñkhoñ meñ hayā ho kar

kaisī hayā kahāñ kī vafā pās-e-ḳhalq kyā
haañ ye sahī ki aap ko aanā yahāñ na thā

dekh us kī chashm-e-shahlā kuuñ agar
nargis-e-bāġh-e-hayā darkār hai

us bazm meñ mujhe nahīñ bantī hayā kiye
baiThā rahā agarche ishāre huā kiye

dard kyā kyā na mile shauq-e-talab se apne
zaḳhm kyā kyā na diye zauq-e-hayā ne tere

sharm-o-hayā kahāñ tak haiñ 'mīr' koī din ke
ab to milā karo tum Tuk be-hijāb ho kar

dil to na dete ham aah le ga.ī lekin 'nazīr'
us kī jabīñ kī hayā aur vo āñkhoñ kī laaj

shabāb ne ḳhud-numā banāyā ye nāz-e-ḳhushrūī ne jatāyā
hayā meñ jis vaqt farq aayā to un ke mukhḌe se zulf sarkī