Tags-Hijr

marham-e-hijr thā ajab iksīr
ab to har zaḳhm bhar gayā hogā

hijr se kam na thī visāl kī rut
aa.ī bechain sī guzar bhī ga.ī

shab-e-hijr meñ ek din dekhnā
agar zindagī hai to mar jā.eñge

kuchh na chalā bas us pe azīzo apnī hī maiñ jaan pe khelā
āḳhir dard-e-hijr ne us ke merā kaam tamām kiyā

hijr kā ġham bhī nahīñ vasl kī parvā bhī nahīñ
dil bhī pahlū meñ nahīñ dil kī tamannā bhī nahīñ

chāhā bahut valī na muā hijr-e-yār meñ
mahbūb kyā ajal bhī nahīñ iḳhtiyār meñ

sabr kab tak hijr meñ tere karūñ
maiñ tirā āshiq huuñ kui ayyūb nahīñ

kaun kitnā zabt kar sakta hai karb-e-hijr ko
rail jab chalne lagegī faisla ho jā.egā

mujh se kahtā thā kal farishta-e-ishq
zindagī hijr kī kahānī hai

is ek hijr ne milvā diyā visāl se bhī
ki tū gayā to mohabbat ko aam maiñ ne kiyā

agar kār-e-mohabbat meñ mohabbat raas aa jaatī
tumhārā hijr achchhā thā jo vaslat raas aa jaatī

aalam hai so hai hijr meñ yaañ josh-e-junūñ kā
sahrā mujhe dikhlāo ki gulzār dikhāo

ye dard-e-hijr aur is par sahar nahīñ hotī
kahīñ idhar kī to duniyā udhar nahīñ hotī

sambhal bhī jaatā thā dil tere hijr meñ, ya.anī
rahā huuñ maiñ bhī tirī aarzū kā munkir yaar!

zard chehra hai mirā zard bhī aisā-vaisā
hijr kā dard hai aur dard bhī aisā-vaisā

kyā tujhe hijr ke āzār batā.e 'komal'
tū to be-dard hai be-dard bhī aisā-vaisā

surḳh sahar se hai to bas itnā sā gila ham logoñ kā
hijr charāġhoñ meñ phir shab bhar ḳhuun jalā ham logoñ kā

hijr kā dard na.ī baat nahīñ hai lekin
din vo guzrā hai ki ab raat se jī Dartā hai

faroġh-e-zaḳhm se raushan rakhā siyāhī ko
atā-e-hijr ko najm-e-visāl ham ne kiyā

mausam-e-hijr meñ tirī yādeñ
dasht meñ ābshār kī sūrat