Tags-Hijr

maiñ tere hijr ke aalam meñ jī nahīñ saktā
so ab yahī ho ki sāñsoñ kī dauḌ puurī ho

azāb-e-hijr bhī dozaḳh se kam nahīñ 'ehsāñ'
ilāhī mujh ko na dikhlā.īyo azaab ke din

yādoñ se bachnā mushkil hai un ko kaise samjhā.eñ
hijr ke is sahrā tak ham ko aate haiñ samjhāne log

maiñ apne hijr meñ thā mubtalā azal se magar
tire visāl ne mujh se milā diyā hai mujhe

raat kī zulf sañvar jaa.e
hijr ko gar mashshāt karo

yak lamha na ho mujh suuñ judā ai mah-e-tābāñ
har aan tire hijr kā mujh haq meñ baras hai

hijr ko hijr na kahnā bhī
'mohsin' be-īmānī hai

bas ek shaam use āvāz dī thī hijr kī shaam
phir us ke ba.ad use umr bhar pukārā nahīñ

ham us ke vasl ke chakkar meñ ġhārat ho ga.e āḳhir
kiyā hotā jo hijr achchhe-bhale insān ho jaate

kaun sotā hai kise hijr meñ niiñd aatī hai
ḳhvāb meñ kis ne tumheñ ek nazar dekh liyā

ḳhvāb hī meñ nazar aa jaa.e shab-e-hijr kahīñ
so mujhe hasrat-e-dīdār ne sone na diyā

hijr ke soḳhta-jāñ aur jaleñge kitne
tuur par baiThe haiñ kab se tirā dīdār to ho

tum qurb kī rāhat kyā samjho tum hijr kī vahshat kyā jaano
tum ne vo raat nahīñ kaaTī tum par vo azaab nahīñ aa.e

hijr kī shab se ghabrāte the
yaar yahī shab behtar niklī

hameñ yaqīn nahīñ hai kisī dikhāve meñ
so samt-e-hijr meñ ham sādgī se nikle haiñ

vasl kī koī nishānī hijr ke bāham rahe
ab ke saada haath par mehñdī lagānā chāhiye

kyuuñ na Dar jā.ūñ dekh kar vo zulf
hai shab-e-hijr kī sī tārīkī

hijr ke samundar se maiñ guzar ke aa.ī huuñ
tere ab na milne se merā maan jaatā hai

betāb raheñ hijr meñ kuchh dil to nahīñ ham
taḌpeñ jo tujhe dekh ke bismil to nahīñ ham

mire vajūd ke āñgan meñ ḳhvāb raushan thā
savād-e-hijr meñ taaza gulāb raushan thā